Пред голем број на финансиски експерти и стручњаци од земјата и регионот, на 09.05.2013 година  во организација на Комисијата за хартии од вредност на Република Македонија, Македонската Берза АД Скопје и Централниот депозитар за хартии од вредност АД Скопје се одржа  заедничка „Конференција на македонскиот пазар на хартии од вредност 2013". Воведни обраќања на манифестацијата имаа Владимир Пешевски, вицепремиер задолжен за економски прашања во Владата на Република Македонија, Иван Штериев, главен извршен директор на Македонска берза АД Скопје и М-р Елизабета Чингаровска, претседател на Комисијата за хартии од вредост на РМ, кои се осврнаа на моменталните состојби на пазарот на хартии од вредност  во Република  Македонија, неговите перспективи и можности за развој.
   Заедничката манифестација посветена на пазарот на хартии од вредност на едно место ги обедини претставниците на финансискиот сектор и индустријата на хартии од вредност во Република Македонија, котираните компании и други акционерски друштва, државните институции и универзитети, како и сите останати чија дејност е поврзана со работењето или инвестирањето во хартии од вредност. На настанот се дискутираше за различни теми поврзани со актуелните состојби на пазарот на хартии од вредност од домашен и од меѓународен аспект, неговите идни развојни правци, значењето на финансиската едукација, како и корелацијата на степенот на развој на македонскиот финансиски систем со долгорочниот економски развој на Македонија.

   Во рамките на панел дискусиите, учество земаа и реномирани странски финансиски екперти кои ги изнесоа своите размислувања во врска со развојните правци во овој сегмент на економијата и ги пренесоа искуствата од нивните земји со финансиските инструменти на пазарите на хартии од вредност.  Официјалниот дел од овогодинешната конференција беше заокружен  со доделувањето на  наградата за најтранспарентно котирано акционерско друштво за 2012 година „Кристално ѕвоно„ која што ја доби Алкалоид АД Скопје.  За прв пат беа  доделени   и   Плакети  за Комерцијална бака АД Скопје, Илирика Инвестментс АД Скопје и Еурохаус АД Скопје како овластени учесници на пазарот на хартии од вредност кои постигнале најголем вкупен промет и најголем број трансакции реализирани во текот на 2012 година. По истите критериуми како овластени брокери плакети добија  Васко Митев, Леонид  Дечев и Жарко Атанасовски.​​