Комисијата за хартии од вредност на Република Македонија, Стопанската комора на Македонија, ИФЦ, Секретаријатот за економски прашања, образование и истражување на Швајцарија и Институтот на директориорганизираа работилница насловена „Зошто и како вашето друштво со ограничена одговорност да го преобразите во aкциoнерско друштво".

    Работилницата имаше за цел да ги поттикне друштвата со ограничена одговорност да се трансформираат во акционерски друштва и да емитираат акции и корпоративни обврзници преку кои полесно, побрзо, поефикасно и поефтино ќе дојдат до потребните финансиски средства за реализација на своите бизнис проекти. Со ова  ќе заживее пазарот на капитал и ќе се збогати понудата на хартии од вредност.

   Воведничари беа претседателката на Комисијата за хартии од вредност  на Република Македонија Елизабета Чингароска, извршната директорка на Стопанската комора на Македонија Јелисавета Георгиева и Кирил Нејков од ИФЦ во Македонија.Полесен пристап до капитал, придобивки од котацијата на хартии од вредност, ограничена одговорност, преносливост на акциите, ефикасно корпоративно управување, стабилност во постоењето, можност за експанзија, зголемена доверба во јавноста, општествена корист и дисперзиран ризик, се предностите на преобразбата од ДОО во АД, беше речено на работилницата во Стопанската комора.

   - Поголемата ефикасност и ефективност кај акционерското друштво, кое не е управувано од акционерите, туку од директорите односно менаџери, кои се избираат како претставници на акционерите ќе се постигне преку одвоеност на сопственоста од управувањето, што не значи дека постојните сопственици во целост би го изгубиле влијанието во управувањето и одлучувањето. Не се плашете дека ќе ја загубите контролата врз Вашата компанија, напротив преку примена на корпоративните практики ќе воспоставите сет на односи помеѓу Вас и менаџментот на компанијата, одборот, акционерите и другите засегнати лица. Тоа обезбедува структура преку која што се утврдуваат целите кои што ќе влијаат на подобрување на  учинокот, работењето, конкурентноста, профитноста и долгорочната вредност на компанијата, порача претседателот на Комисијата за хартии од вредност Елизабета Чингаровска пред присутните претставници на ДОО.

   На работилницата преку презентации се симулираше практичен пример на преобразба на едно друштво со ограничена одговорност во акционерско друштво, а беше промовиран и Прирачник за преобразба на ДОО во АД , којдоколку компаниите се одлучат на ваков чекор ќе им помогне при спроведувањето на постапката.​​