​        На семинарот што се одржа на 25-26 октомври, 2013 година во хотелот ,,Сириус,, во Струмица присуствуваа Претседателот на Комисијата за хартии од вредност на Република Македонија, М-р Елизабета Чингаровска, вработените во Стручната служба на КХВ, Главниот извршен директор на Македонската берза АД Скопје, Иван Штериев, Извршниот директор на Централниот депозитар за хартии од вредност АД Скопје Елена Јакимовска Петровска, директорите на брокерските куќи и банките кои имаат дозвола за работење со хартии од вредност во земјава, како и првите луѓе на друштвата за управување со инвестициски фондови .

   На почетокот на семинарот, учесниците ги поздрави Претседателот на Комисијата, М-р Елизабета Чингаровска , која истакна дека цел на средбата е анализа на состојбата на пазарот на хартии од вредност и размена на идеи, проблеми и прашања со кои се соочуваат овластените учесници, за да се утврди на кој начин може Комисијата за хартии од вредност на Република Македонија да помогне за подобрување на моменталните состојби на пазарот.

       Се анализираше вкупниот промет остварен на Берзата оваа година кој заклучно со 20.10.2013 година бележи пад од 43,45% во однос на истиот период лани. Беше констатирано дека најголем пад е забележан кај прометот од блок трансакции и јавни берзански аукции.Вредноста на МБИ10 индексот е намалена за 10,05% во споредба со лани, а  учеството на странските инвеститори во вкупниот промет од страната на купување е 9,41%, додека од продажната страна учествуваат со 13,47%. Ваквите показатели ја отсликуваат состојбата на пазарот, која пак како што беше заеднички констатирано бара мерки за унапредување и засилена комуникација со компаниите и со потенцијалните инвеститори. Тоа подразбира развој и ефикасно функционирање на сите институции на пазарот , информираност на потенцијалните инвеститори за пласман на слободните средства со цел остварување на дополнителна корист, едукација  и информираност на компаниите/единиците на локална самоуправа за можноста за алтернативни извори на финансирање и друго.​​