На 19 декември, 2013 година,  Народната банка на Република Македонија, Министерството за финансии, Комисијата за хартии од вредност на Република Македонија, Агенцијата за супервизија на осигурување и Агенцијата за супервизија на капитално финансираното пензиско осигурување  потпишаа Меморандумот за соработка. Целта е институциите надлежни за регулирање на финансиските услуги, со заеднички заложби и проекти, да го подигнат нивото на финансиска писменост на населението во Република Македонија. Своите потписи на Меморандумот за соработка  ги ставија Вицепремиерот и Министер за финансии М-р Зоран Ставрески, Гувернерот на Народната банка на Република Македонија М-р Димитар Богов, Претседателот на Комисијата за хартии од вредност на Република Македонија  М-р Елизабета Чингаровска, Претседателот на Советот на  експерти на Агенцијата за супервизија на осигурувањето Д-р Климе Поповски и Претседателот на Советот на  експерти  на Агенцијата за супервизија на капиталното финансиско пензиско осигурување  Д-р Булент Дервиши.

      -  Целта е полесно да се остварат заедничките цели, бидејќи, како што рече Гувернерот на Народната банка на Република Македонија Димитар Богов, нашиот интерес е да имаме население кое ќе ги разбира многу добро финансиските услуги што ги користи и на тој начин нема да влегува во непотребни ризици. На тој начин, потенцира, придонесуваме за избегнувње и минимизирање на ризиците во финансискиот сектор, а со тоа и креираме постабилен финансиски сектор.

       Според Вицепремиерот и Министер за финансии Зоран Ставрески, потпишувањето на овој Меморандум е уште еден чекор во насока на зголемување на координацијата на регулаторните тела заради постабилен финансиски сектор и запознавање на јавноста со можностите што ги нуди финансискиот сектор.

      - Верувам дека на ваков начин ќе придонесеме и во Македонија да се подигне нивото на финансиска писменост и на тој начин ќе се вклучиме во европските трендови кои почнаа особено по финансиската криза со цел да се зголеми нивото на финансиската писменост и да се намалат ризиците, рече Министерот Ставрески.

       Потписниците на Меморандумот се согласија да се формираКоординациско тело на регулаторните институции во Македонија за финансиска едукација. Улогата на Координациското тело ќе биде:

1.    Да покренува иницијативи до надлежните институции за донесување акти коишто ќе ја поткрепат идејата за финансиска едукација на населението во Република Македонија;

2.    Да дефинира и да предлага заеднички проекти за финансиска едукација;

3.    Да изработува стратегиски документи;

4.   Да ги организира, да ги спроведува и да ги проценува анкетите за нивото на финансиска писменост во земјата и нивото на финансиска вклученост на населението во финансискиот систем во државата;

5.    Да организира работни сесии, семинари и други видови обуки и настани;

6.    Да промовира регионална и интернационална соработка.

       Изработката на стратегиските документи ќе се темели врз основа на меѓународно прифатените принципи за финансиска едукација на Групацијата 20 најразвиени земји и други мултилатерални институции и организации.

       Финансиски описменетите граѓани ќе можат да направат правилен и здрав избор на финансиските производи, а со тоа ќе се придонесе и за постабилен и сигурен финансиски систем во државата.​​