​   ​На работилницата што се одржа на 28-29 ноември, 2014 година во хотелот ,,Епинал,, во Битола присуствуваа Претседателот на Комисијата за хартии од вредност на Република Македонија, М-р Елизабета Чингаровска, вработените во Стручната служба на КХВ, Главниот извршен директор на Македонската берза АД Скопје, Иван Штериев, Извршниот директор на Централниот депозитар за хартии од вредност АД Скопје Елена Јакимовска Петровска, директорите на брокерските куќи и банките кои имаат дозвола за работење со хартии од вредност во земјава, како и првите луѓе на друштвата за управување со инвестициски фондови. На почетокот на семинарот, учесниците ги поздрави Претседателот на Комисијата, М-р Елизабета Чингаровска, која истакна дека ваквите средби стануваат традиција од кои има реални ефекти. За тоа говори фактот што иницијативите и предлозите кои беа презентирани минатата година во Струмица веќе се преточени во регулатива или се спроведени проекти. Целта на средбата беше анализа на актуелните состојби на пазарот на хартии од вредност и размена на идеи, проблеми и прашања со кои се соочуваат овластените учесници, за да се утврди на кој начин може Комисијата за хартии од вредност на Република Македонија да помогне за подобрување на моменталните движења на пазарот. Заеднички беше констатирано дека треба да се продолжи со мерки за унапредување и со засилена комуникација со компаниите и со потенцијалните инвеститори.​​