НОВА СОФТВЕРСКА ПЛАТФОРМА ЗА ИНВЕСТИЦИСКИТЕ ФОНДОВИ
18.02.2015
     Доставувањето и обработката на извештаите на инвестициските фондови ќе биде олеснето со новиот софтверски систем за супервизија и известување што го воведе Комисијата за хартии од вредност на Република Македонија. Софтверот е направен со финансиска поддршка од Европската банка за обнова и развој, а со него сите известувања, вклучувајќи ги и нефинансиските известувања, како и барањата за одобрување на рекламен материјал, ќе се доставуваат електронски. Со ова ќе се намали товарот за дневно известување од страна на друштвата. - Преку зголемената транспарентност и достапност на информации за фондовите, стравот и несигурноста како најголема причина за неостварување на успех и успешна алокација, ќе бидат минато за новите потенцијални инвеститори.Ваквата електронска алатка има за цел да ја зголеми транспарентноста на пазарот на хартии од вредност, да обезбеди поголема достапност на податоци на потенцијалните инвеститори кои е потребно да се објавуваат согласно важечките законски прописи, да се воспостави статистика, да се создаде слика за актуелната кондиција и потенцијал на инвестициски фондови како крупни и клучни играчи на пазарите на капитал, како и да се зајакне заштитата на малцинските акционери при прегрупирање на сопственичките структури на компаниите, истакна Претседателот на КХВ, Елизабета Чингаровска. Горди сме што работиме заедно со ЕБОР на овој проект и веќе можеме да ги воочиме предностите од модернизацијата на софтверот, кој ни овозможува да бидеме поефикасни и да работиме во согласнот со еволуцијата на пазарот на капитал. Задоволство ни е што ја надградивме соработката со ЕБОР преку овој проект", изјави Елизабета Чингаровска, Претседател на КХВ. 
       Според Анка Јоана Јонеску, претставник на ЕБОР за Македонија, придобивките од новиот софтвер се големи и значајни. - Поддршката на развојот на локалните пазари на капитал е еден од приоритетите на ЕБОР во Македонија. Ова претставува значаен иновативен проект за пазарот на капитал во земјата. Ефикасната супервизија е главен предуслов за развој на финансиските пазари и во таа смисла со овој проект Комисијата се ориентира кон супервизорски пристап базиран на ризик, вршејќи онлајн мониторинг врз ентитетите и следејќи ги потребите за капитал на инвестициските фондови, рече таа. Ни претставува задоволство да видиме дека проектот е успешно имплементиран и истовремено сакаме да им се заблагодариме на нашите партнери, Комисијата за хартии од вредност, за нивната соработка и комплетирањето на проектот," изјави Анка Јоана Јонеску, Претставник на ЕБОР за Македонија. Со воведување на новиот софтвер, Комисијата ќе се опреми со точен и безбеден извор на податоци, доставени од учесниците на пазарот на капитал. Новиот софтвер ќе придонесе за поголема ефикасност и подобри стандарди на известување, поддржувајќи ја Македонија да се усогласи со регулативата на пазарите на капитал и правната рамка, согласно директивите на Европската Унија.​

​