​   Претседателот на Комисијата за хартии од вредност на Република Македонија М-р Елизабета Чингаровска и членот на КХВ г-дин Милаим Ајдини, заедно со претставници на Стручната служба на 8 април ,2015 година остварија работна посета на Агенцијата за регулирање на финансискиот пазар во Република Албанија (FSA), Тирана. Домаќините организираа работилница на тема: ,,Супервизијата и регулативата на пазарот на капитал и инвестициските фондови во Албанија,,. Отворајќи ја работилницата, Извршниот Директор на FSA, г-ѓа Енкеледа Шехи, направи краток опис на пазарите над кои FSA врши надзор и укажа на важноста што институцијата ја има за домашниот финансиски пазар. За време на работилницата, експерти на FSA го презентираа напредокот и развојот на пазарот на хартии од вредност и инвестициските фондови во Албанија. На пример, вкупната актива на инвестициските фондови на крајот на 2014 година изнесувала 4,7% од бруто домашниот производ, што претставува пораст во споредба со 2012 година, кога инвестициските фондови ја започнале за прв пат својата активност и нивната актива изнесувала само 1,2% од вкупниот БДП. При тоа, беше потенцирано значењето на пазарот на капитал во вкупната албанска економија, а беа опфатени и следните теми: - Правна рамка со која се регулира и врши надзор на пазарот на хартии од вредност и инвестициски фондови; - Инфраструктура на пазарот, како и улогата на FSA во нејзината супервизија и регулатива; - Онлајн електронската платформа на FSA за пазарот на хартии од вредност на Владата; - Напредокот на Албанија во Процесот за стабилизација, асоцијација за финансиските пазари, под надзор на FSA; - Европските директиви за регулирање на пазарот на капитал, предизвици и напорите на Албанија за нивната примена; - Важноста на развој на Тиранска берза; - Најновите случувања за зголемување на независноста на телото и јакнење на неговата улога во финансиските пазари. 

    Една поинаква перспектива беше презентирана од страна на Главниот извршен директор на "Рајфајзен Инвест", кој ги прикажа резултатите низ годините наназад и тоа за двата инвестициски фонда, "Рајфајзен Престиж" и "Рајфајзен Евро Инвест, кои имаат околу 33 илјади членови. Претседателот на Комисијата за хартии од вредност на Република Македонија М-р Елизабета Чингаровска ја претстави актуелната состојба на македонскиот пазар на капитал и реформите кои се спроведуваат од аспект на законска регулатива, примена на најновите софтверски решенија, имплементација на европските директиви и друго.      Извршниот Директор на FSA, г-ѓа Шехи и претседателот на Комисијата за хартии од вредност на Република Македонија, г-ѓа Чингаровска оваа посета ја оценија како многу важна, која ќе биде поттик да се продлабочи соработката и да се зајакнат односите меѓу двете институции .​​