​     Традиционално како и секоја година, Комисијата за хартии од вредност на Република Македонија на 28-29 ноември, 2015 година во Струмица на заедничка маса ја собра целата брокерска и фондовска индустрија во земјава. Целта е да се направи анализа на актуелните состојби на пазарот на хартии од вредност и да се утврдат приоритетите за наредната 2016 година. Отварајќи ја работилницата, Претседателот на Комисијата, М-р Елизабета Чингаровска, истакна дека од ваквите средби кои се одржуваат по трет пат, видливи се реални ефекти, односно иницијативите и предлозите кои беа презентирани минатата година во Битола во најголем дел веќе се преточени во регулатива или се спроведени проекти. Преку размена на идеи, сугестии и проблеми со кои се соочуваат овластените учесници подвлече Претседателот на КХВ Елизабета Чингаровска, Комисијата за хартии од вредност на Република Македонија како регулатор на пазарот на капаитал во рамките на своите надлежности презема активности и мерки за подобрување на моменталните услови и движења на пазарот. Заеднички беше констатирано дека сите овластени учесници треба да преземаат чекори кои би придонеле за унапредување на вкупните состојби на нашиот пазар кој е мал со ниска ликвидност. 

      Преку престојното регионално поврзување на берзите на трите земји: Македонија, Бугарија и Хрватска и засилена комуникација со компаниите и со поголемо присуство на потенцијалните институционални инвеститори треба да се зголеми довербата во пазарот. Потребно е да се истражува потенцијалот на пазарот и компаниите да се поттикнуваат да бараат можност за финансирање на своите активности на берзата. На работилницата присуствуваа и членот на Комисијата за хартии од вредност на Република Македонија Милаим Ајдини, вработените во Стручната служба на КХВ, Главниот извршен директор на Македонската берза АД Скопје, Иван Штериев, Извршниот директор на Централниот депозитар за хартии од вредност АД Скопје Елена Јакимовска Петровска, директорите на брокерските куќи и банките кои имаат дозвола за работење со хартии од вредност во земјава, како и првите луѓе на друштвата за управување со инвестициски фондови.​​