​Со особено задоволство ја прифатив поканата да говорам на оваа Конференција, би рекла не секојдневна, зашто токму деновиве Македонската берза одбележува 20 години од своето постоење и она што за мене е уште поважно денеска станува реалност долгогодишната заложба за регионално поврзување на берзите во Југоисточна Европа, свечено се пушта во употреба СЕЕ ЛИНК платформата истакна Претседателката на КХВ М-р Елизабета Чингаровска на Годишната Конференција на Македонска берза што се одржа на 29 март, 2016 година во Александар Палас, Скопје. Според неа со овој проект, Македонската берза покажала дека е успешна и модерна институција, со задоволителен тренд на изградба на својот капацитет. На општо задоволство, рече Чингаровска тоа е разбрано, и од нас како регулатор и затоа оценката е дека Македонската берза по 20 години, денес е респектибилна саморегулирачка институција, со јасна визија, мисија и цел. Свесни сме дека унапредувањето на пазарите на хартии од вредност претставува важен сегмент за развојот на националната економија во целина , нашиот пазар на хартии од вредност, има мал број на котирани компании, ниско ниво на пазарна капитализација и мала ликвидност, со потешкотија ги остварува своите стратешки цели и планови за да одговори на сите предизвици на техничко-технолошкиот развој. Поради тоа, продолжи Претседателката на КХВ се покажа дека најекономичниот и најефикасниот начин на остварување на натамошен раст и развој е токму соработката и интеграцијата на пазарите на хартии од вредност во регионов. Предностите на регионалната интеграција како што се: диверзификација на ризикот, намалување на трошоците на работење, поголем поврат на вложените средства и интезивен прекуграничен слободен проток на капитал, може во голема мера да влијаат врз остварување на зацртаните цели. Чингаровска очекува дека преку интеграцијата треба да дојде до соединување и поврзување на ресурсите на фрагментираните и на различен степен на развој пазари на хартии од вредност, што пак ќе влијае врз можноста, да се мобилизираат локалниот и меѓународен капитал во насока на нивен инфраструктурен развој, а преку тоа и на целокупниот финансиски систем. 

      Според Претседателката на КХВ, ова отвора можност потенцијалните инвеститори од регионот и надвор од него да имаат избор на различни хартии од вредност, а издавачите да имаат полесен пристап до поголем број на потенцијални инвеститори, кои ќе бидат подготвени да ги вложат своите средства во развојот на македонските компании. Клучната поента е дека регионалната интеграција доколку се води на правилна основа и на прагматичен начин може да ја зголеми ефективноста, ликвидноста, ефикасноста и конкурентноста на регионалните пазари на хартии од вредност. Токму ваков пазар , на кој би се вовеле нови финансиски инструменти и услуги, со поефикасна алокација на капиталот, треба да биде визијата за долгорочен развој на македонскиот пазар . Чингаровска заклучи дека ова е дефинитивно правецот со кој македонскиот пазар на хартии од вредност ќе ја избегне позицијата на „локален губитник“ и ќе се приклучи во групата на „глобални добитници“.​​​​​