​На покана на Комисијата за хартии од вредност на Република Македонија на 30 јуни во Скопје присуствуваа претставници на регулаторните тела на пазарите на капитал од Република Словенија, Република Хрватска , Република Србија и Република Албанија, кои учествуваа на Завршната конференција по повод финиширање на проектот ,, Понатамошно усогласување со регулативата на ЕУ во областите на движење на капиталот и плаќање и финансиски услуги –пазари на хартии од вредност и инвестициски услуги,, финансиран од Европската унија, кој се имплементираше во последните 18 месеци. 

      Европската перспектива на пазарите на капитал во регионот беше клучната тема на Панелот со кој претседаваше Д-р Александар Стојков, Комисионер на Македонската Комисија за хартии од вредност, а панелисти беа Анка Чадеж,заменик директор на Словенечката Агенција за тргување со хартии од вредност, Мирјана Ивошевиќ , Комисионер на Српската Комисија за хартии од вредност, Ѓурѓица Михотиќ од Хрватската ХАНФА и Енкеледа Шехи, Генерален Извршен Директор на ФСА, Албанија. Учесниците говореа за добрите и за лошите страни на имплентацијата на правната рамка на ЕУ во националните регулативи и за тоа како регионалните пазари на капитал го гледаат нивното учество во ЕУ. Беше констатирано дека сите пазари на капитал во регионот заради слабата макроекономска ситуација, високиот буџетски дефицит , невработеноста и нискиот БДП се соочуваат со ниска ликвидност , но имаат потенцијал за раст. Позитивно е тоа што има компании кои работат многу добро и можат да бидат атрактивни за инвеститорите , но потребни се и структурни реформи. Дискутантите ја поддржаа СЕЕ линк, регионалната инфраструктура за тргување со хартии од вредност и веруваат дека ова поврзување треба да придонесе за поголема ликвидност на пазарите на Југоисточна Европа. Оваа интеграција беше речено е важна за заживување на пазарите на капитал во регионот.​​​​