​

Традиционално како и секоја година, Комисијата за хартии од вредност на Република Македонија на 04-05 ноември, 2016 година  во  Маврово   на заедничка маса ја собра целата брокерска и фондовска индустрија во земјава.

    Отварајќи ја работилницата, Претседателот на Комисијата, М-р Елизабета Чингаровска, истакна дека од ваквите средби кои се одржуваат по четвртти пат, видливи се реални ефекти, односно иницијативите и предлозите кои беа презентирани минатата година во Струмица  во најголем дел веќе се преточени во регулатива или се спроведени проекти.

Преку размена на идеи, сугестии и проблеми со кои се соочуваат овластените учесници подвлече Претседателот на КХВ Елизабета Чингаровска, Комисијата за хартии од вредност на Република Македонија како регулатор на пазарот на капитал во рамките на своите надлежности презема активности и мерки за подобрување на условите и движењата  на пазарот.

На работилницата беше презентирана прелог -законската регулатива која е целосно усогласена со европските директиви, а чија подготовка започна уште во 2015 година преку проектот за Понатамошно усогласување со регулативата на ЕУ во областите на движење на капиталот и плаќање и финансиски услуги –пазари на хартии од вредност и инвестициски услуги, финансиран од Европската унија.

Беше констатирано дека создавањето на посилен и високо регулиран пазар на хартии од вредност, усогласен со ЕУ регулативата ќе ја зголеми финансиската еластичност и ќе помогне парите да се движат таму каде што може да бидат најпродуктивни, каде што ќе можат да го помогнат развојот на компаниите.

Исто така, беше анализирано како функционира и кои се ефектите од СЕЕ линк – регионална платформа за тргување со акции на повеќе компании од регионот. Со излезот на платформата, компаниите се повидливи за странските вложувачи, а осум од десетте овластени учесници веќе имаат шанса за повеќе клиенти и заработка, а македонските граѓани за прв пат самостојно да инвестираат на пазарите во регионот.

Беше дискутирано и за обврските на овластените учесници на пазарот на хартии од вредност при спречувањето на перење пари и финансирањето на тероризмот, при што беше заклучено дека  сите треба навремено да ги ажурираат Програмите за спречување на перење пари и финансирање на тероризмот.

Заеднички беше констатирано дека сите овластени учесници треба да преземаат чекори кои би придонеле за унапредување на вкупните состојби на нашиот пазар. Во таа насока, брокерската и фондовската индустрија во наредниот период канализирано можат да ги доставуваат до КХВ сите отворени прашања и предлози.

На работилницата присуствуваа и членот на Комисијата за хартии од вредност на Република Македонија Милаим Ајдини, вработени во Стручната служба на КХВ, Главниот извршен директор на Македонската берза АД Скопје, Иван Штериев, Извршниот директор на Централниот депозитар за хартии од вредност АД Скопје Елена Јакимовска Петровска, директорите на брокерските куќи и банките кои имаат дозвола за работење со хартии од вредност во земјава, како и првите луѓе на друштвата за управување со инвестициски фондови. За прв пат на оваа работилница учествуваа и претставници на Министерството за финансии.