Во периодот од 12-18 Март 2018 година, Комисијата за хартии од вредност на Република Македонија ја одбележа Глобалната недела на парите, со цел да ги поттикне младите да инвестираат во својата иднина, истакнувајќи ја важноста на раната финансиска едукација, со што ќе им помогне да станат свесни за своите финансиски права, ќе им ја олесни пристапноста до финансиските услуги и ќе ги развие нивните вештини.

Темата за оваа година на Глобалната недела на парите е „Парите имаат значење", со намера младите луѓе да научат мудро да управуваат со парите што ги поседуваат и да штедат за својата иднина.

Во рамките на одбележувањето, Комисијата за хартии од вредност на Република Македонија на неколку паралелки од III-та и VI-та година од Средното економско училиште "Васил Антевски – Дрен" од Скопје, им го презентираше значењето на регулаторот и функционирањето на пазарот на хартии од вредност. Воедно, се организираше и посета од страна на 50-тина ученици од средното училиште на Македонската Берза АД Скопје. Учениците практично се запознаа со работењето на Берзата и тргувањето со хартии од вредност.

Вакви активности се организираат редовно изминативе шест години, со единствена цел, а тоа е да се подигне нивото на финансиска писменост кај младото население на Република Македонија.

Во текот на март, Координациското тело на регулаторните институции за финансиска едукација во Македонија, коешто го сочинуваат Народната банка на Република Македонија, Министерството за финансии, Агенцијата за супервизија на осигурувањето, МАПАС и Комисијата за хартии од вредност на РМ, во соработка со Бирото за развој на образованието и со Сојузот на микрофинансиски организации, ја одбележува Глобалната недела на парите.

За време на посетите се изведуваат едукативни предавања на теми од областите на институциите што ги покриваат, односно од областите на парите, штедењето, тргувањето, банкарскиот сектор, инвестирањето, осигурувањето, пензискиот сектор и други теми поврзани со функционирањето на финансиските системи.