​

Претседателот на Комисијата за хартии од вредност на Република Македонија М-р Нора Алити придружувана од комисионерите Г-ѓа Лиле Делиџакова и Проф. Д-р Зоран Колев на 11 јули, 2018 година одржаа прв работен состанок со Групацијата за работење со хартии од вредност при Стопанската комора на  Македонија.

  ,,Ова е прв состанок со Вас како претставници на берзанската индустрија и очекувам натамошна плодна соработка.  Како Комисија за хартии од вредност на Република Македонија цениме дека само преку конструктивен однос и дијалог се развива пазарот на хартии од вредност и се разрешуваат сите ситуации. Комисијата за хартии од вредност на Република Македонија се залага за создавање на пазарно опкружување кое ја оправдува довербата на инвеститорите и се карактеризира со транспарентност и интегритет. Наши приоритети се преземање активности и мерки за  инклузивен и одржлив развој на пазарот на капитал, зајакнување на интегритетот на пазарот и оптимизирање на институционалните перформанси, им порача  Претседателот на КХВ М-р Нора Алити.

      Сите посакуваме добра иднина на пазарот на хартии од вредност, сите работиме за неговиот просперитет и развој, и токму заради тоа сите треба да се обединиме околу заедничката идеја- конкурентен, атрактивен, ефикасен и ефективен пазар на хартии од вредност кој ќе држи чекор со поразвиени пазари од регионот и ќе биде еден од моторите на придвижување на националната економија, беа главните тези на учесниците на состанокот.

    Беше констатирано дека сите заедно: Комисијата за хартии од вредност на Република Македонија , Македонската берза, Централниот депозитар за хартии од врeдност, брокерските куќи и Друштвата за управување со инвестициски фондови треба да преземаат чекори кои ќе придонесат за унапредување на вкупните состојби на нашиот пазар,како и за  зголемување на странските и домашните инвеститори.