​

Комисијата за хартии од вредност на Република Македонија и меѓународната гимназија Нова Скопје  склучија  Меморандум за соработка кој се очекува да резултира со дополнителна едукација на средношколците. Практичната настава ќе ја  водат стручни лица од Комисијата, а се предвидени и посети на  институциите на пазарот на капитал како Берзата, Депозитарот, брокерските куќи  и друштвата за управување со инвестициски фондови. Претседателката на КХВ М-р Нора Алити во оваа пригода истакна: ,,Потпишувањето на меморандумот  е само еден чекор во нашите заложби за  подигнување на финансиската писменост,  а во таа насока и  воведувањето на факултативен предмет „Пазар на хартии од вредност" преку кој  средношколците  ќе ги прошируваат сопствените  знаења   од  оваа сфера. Преку практична настава ќе учат за хартиите од вредност, ќе се запознаат со функционирањето на пазарот на хартии од вредност, преку најразлични  активности ќе ги откријат предностите и ризиците на тргувањето со акции и купувањето на удели во инвестициски фондови, и сето тоа акумулирано знаење очекуваме да  им ја  зголеми конкурентноста при идното вработување. Посакуваме некои од нив да станат  идни  креатори на финансиските политики на Република Македонија. Впрочем, финансиското  знаење им помага на луѓето да си го подобрат животниот стандард.,,

      Во фокусот на Комисијата за хартии од вредност на Република Македонија  е едукацијата и финансиската писменост , бидејќи  таа е  од клучно значење за исполнување на мисијата за заштита на инвеститорите и за регулиран пазар на хартии од вредност во Република Македонија.По пилот проектот во Меѓународната гимназија Нова Скопје, КХВ  планира , практична настава од областа на пазарот на капитал  да  воведе  и во други средни училишта во Скопје и државава.