​

Претседателката на Комисијата за хартии од вредност М-р Нора Алити, заедно со комисионерката Лиле Делиџакова  на 14 ноември, 2018 година, одржаа работен состанок со В.Д. директорката,  Вјолца Елмази  на Академијата за судии и јавни обвинители Павел Шатев. На средбата, во седиштето на Академијата, преку меѓусебна презентација на досегашната соработка помеѓу Комисијата за хартии од вредност и Академијата, и двете страни  се согласија дека е неопходно истата да се продлабочи и унапреди, пред се со зголемување на бројот на тркалезни маси и работилници од оваа област во континуираната и во почетната обука на Академијата.

Претседателката на Комисијата за хартии од вредност М-р Нора Алити го изнесе фактот дека постои недостаток од обуки во оваа материја во Академијата, што претставувало и дополнителен мотив да се иницира средбата, бидејќи според неа ако повеќе судски предмети поврзани со хартии од вредност добијат разрешница се зајакнува довербата во пазарот на хартии од вредност, кој е основен предуслов за привлекување на инвеститори и прилив на нов капитал во Република Македонија.

Исто така, од страна на Академијата беше упатена покана до претставниците на Комисијата за хартии од вредност да достават апликации за едукатори на Академијата, како би се унапредил квалитетот на обуките од областа на хартиите од вредност, трговското право, корпоративно право и слично, а воедно и да се збогати базата на едукатори на Академијата во оваа област.

Меѓудругото, на овој состанок главен акцент се стави на предлогот да се потпише и Меморандум за соработка помеѓу Академијата и Комисијата за хартии од вредност во блиска иднина.  Со склучување на Меморандум за соработка, двете страни ќе манифестираат јасна волја за соработка која има цел создавање и градење на добра пракса и владеење на добро корпоративно управување, неприкосновена заштита на инвеститорите и акционерите и продлабочена соработка во спречувањето на нечесни и незаконски дејства на пазарот на капитал. Меморандумот ќе обезбеди основ за разменување на податоци и на документи и ќе се утврдат динамиката и полињата на соработка и заедничко делување.