​

        Комисијата за хартии од вредност на Република Македонија на 24 ноември во Струга ја организираше Традиционалната Годишна конференција на пазарот на капитал на која главна тема беа најавените нови закони - Закон за финансиски инструменти и закон за проспекти и обврски за транспарентност.

    Потребата за донесување на овие закони произлегува од потребата за усогласувањето на нашата со легислативата на Европската Унија, процесот на нивното  донесување ќе биде отворен и инклузивен, а оваа средба на КХВ со берзанската заедница е само еден чекор кон тоа, рече Претседателката на КХВ М-р Нора Алити, отворајќи ја традиционалната Годишна конференција. Драфт законите се работат на техничко-оперативно ниво во работни групи во Министерството за финансии, во кои има и претставници на Комисијата за хартии од вредност, но со комисионерите продолжи Претседателката Алити сметавме дека иако сме во многу рана фаза добро е да се презентираат новините, за да можеме како Комисија да се запознаеме со вашите ставови, размислувања, коментари, забелешки  пред да имаме првична верзија на предлог законите .Според неа, важно е да се  дебатира со аргументи и одлуките што ќе се носат да бидат јасно образложени. Во своето обраќање, Претседателката на КХВ најави дека целата законска регулатива што ја спроведува Комисијата  наскоро ќе биде достапна на три јазици -македонски, албански и англиски, која што  заинтересираните ќе можат да ја преземаат на веб страницата на КХВ. 

М-р Нора Алити на крајот резимираше дека за неа како прв човек на институцијата   најважно е  сите активности што се преземаат да се во насока на исполнување на мисијата на КХВ која се базира врз три столба: (1) да ги заштитиме инвеститорите, (2) да одржуваме фер, сигурен, транспарентен и ефикасен пазар на хартии од вредност, и (3) да го олесниме привлекувањето на капитал. Секој  столб на оваа мисија е критичен и подеднакво важен, ако неодржуваме рамнотежа, тогаш инвеститорите, пазарот и, конечно и економијата ќе страдаат, заклучи Претседателката на КХВ.

    На традиционалната годишна конференција за пазарот на капитал се обрати и Комисионерката Лиле Делиџакова, која рече: Како ново раководство на Комисијата за хартии од вредност на РМ зацртавме дека заложбите ќе бидат насочени кон континуирано подобрување на инвестициската клима во Република Македонија, практицирање на добро корпоративно управување, неприкосновена заштита на инвеститорите и на акционерите и спречување на нечесни и незаконски дејства на пазарот на капитал. Ние се залагаме за создавање и одржување на пазарно опкружување кое го оправдува довербата на инвеститорите и се карактеризира со транспарентност и интегритет. Но, покрај овие заложби, истакна Делиџакова, ставаме акцент и на оптимизирање на институционалните перформанси на Комисијата,што подразбира развој на човечкиот потенцијал, институционално управување и организациска инфраструктура и општествена одговорност.  

Годишната конференција, беше интерактивна, па претставниците на брокерските куќи,овластените банки кои работат со хартии од вредност, друштвата за управување со инвестициски фондови, Македонската берза, Централниот депозитар за хартии од вредност и претставникот на друштвото за инвестициско советување поставуваа прашања, изнесуваа забелешки и коментари, даваа предлози за повеќе теми поврзани со пазарот на капитал.

Оваа Конференција, Комисијата за хартии од вредност на Република Македонија ја одржува традиционално и е шеста по ред во ваков состав и формат.