​

   Претседателот на Комисијата за хартии од вредност на Република Македонија М-р Нора Алити  денеска на 15 јануари, 2019 година  го отвори  Семинарот на тема ,,Акција против економскиот криминал,, кој е финансиран од Советот на Европа, а  организиран на иницијатива на Комисијата за хартии од вредност. Претседателката Алити на почетокот им се заблагодари на организаторите што за релативно краток временски период организираат втор семинар на тема поврзана со спречувањето перење пари и финансирање тероризам, а на друштвата за  управување со инвестициски фондови за самоиницијативноста и за демонстрираната заложба  и посветеност  за доследна примена на  Законот за спречување перење пари и финансирање на тероризам.

Во своето обраќање, Претседателката на КХВ истакна дека Комисијата  како регулатор и орган на надзор има два клучни интереси во напорите за спречување перење пари и финансирање на тероризам: прво, КХВ е одговорна, преку едукација, контрола а онаму каде што е потребно и преку изрекување на соодветни и пропорционални мерки, да обезбеди учесниците на пазарот на капитал  доследно да го почитуваат законот и  второ,  Комисијата е и корисник на финансиски разузнавачки информации.  Па оттаму, потенцира  Претседателката на КХВ, ефективноста на регулаторите во борбата за спречување перење пари и финансирање тероризам значително зависи од способноста на индустријата да известува за сомнителни активности, како и од способноста на различните органи на надзор, и органи на прогон  да соработуваат и да споделат навремени и квалитетни финансиски разузнавачки информации.  Во овој контекст, М-р Алити ја истакна соработката со Управата за финансиско разузнавање, со која КХВ е во постојана комуникација и координација.  Оваа година рече Претседателот на Комисијата за хартии од вредност на Република Македонија планираме и неколку заеднички контроли,  затоа што и двете институции веруваат дека само преку синхронизиран пристап  може да  се постигнат резултати.