​

    Чест ми е да Ве поздравам во мое лично име и во името на Комисијата за хартии од вредност и да изразам благодарност до претставниците на ИФЦ-Меѓународната финансиска корпорација за поканата за учество на оваа работилница.

Соработката на Комисијата за хартии од вреност на РМ и IFC-Меѓународната финансиска корпoрација, датира уште од 2008 година, во моментите кога транспарентноста на акционерските друштва со посебни обврски за известување кои се водеа во Регистарот на КХВ, беше на многу ниско ниво. Со ИФЦ изготвивме Прирачник за акционерски друштва со посебни обврски за известување, кој придонесе за значително подобрување на процентот на објавувањето на информации во Регистарот на акционерски друштва со посебни обврски за известување од страна на компаниите и се влијаеше на подигнување на свеста кај акционерските друштва дека навременото доставување на податоци е во нивни интерес, а не само законска обврска. Со имплементација на овој проект, се оствари и една од стратешките цели на Комисијата.

Заради подобра информираност на акционерските друштва за постапката за издавање на нова емисија на хартии од вредност Комисијата од врата на врата заедно со ИФЦ  ги посети сите  АД со посебни обврски за известување кои се водат во Регистарот на Комисијата за да им ги објасни бенефитите од прибирање на свеж капитал преку ваков начин на финансирање.

Комисијата заедно со ИФЦ, им помогна на компаниите полесно да ги разберат обврските кои произлегоа од задолжителната котација  на македонската берза, преку која се постигна поголема транспарентност, полесен пристап до капитал и до зголемување на пазарната вредност на компаниите и атрактивноста за вложувања во нив.

          Заеднички се обидовме да ги мотивираме ДОО да се трансформираат во АД, со што пак би се зголемила довербата во друштвата од страна на јавноста заради  поголема  ефикасност и ефективност, како и  полесен пристап до алтернативен начин за финансирање на проекти.  Им укажавме  дека на тој начин  ќе ја однесат  компанијата на повисоко ниво на одржливост, пред да ја препуштат  на следните генерации.

   Комисијата за хартии од вредност на Република Македонија  свесна дека  едукацијата е потребна без разлика дали станува збор за развиена земја и без разлика на образованието на населението,а со оглед на фактот што  во последните години има многу иновации во овој сектор,  во континуитет, а со поддршка на IFC, ја едуцира широката јавноста, пред се средношколците и студентите како идни учесници и креатори на активностите на пазарот на капитал. Комисијата за хартии од вредност на РМ, Македонската берза и Институтот на директори, поддржани од IFC организираат и обука за корпоративни секретари во Република Македонија, со што уште еднаш покажавме колку е важна корпоративната свест на раководните тимови во компаниите. Само преку едукација на внатрешните правни советници се унапредува квалитетот на корпоративното управување и се почитуваат добрите корпоративни правила и политики.

Комисијата за хартии од вредност на Република Македонија без дилема ја  поддржа иницијативата за изработка на нов Кодекс, во кој ќе се постават нови стандарди и принципи за корпоративно управување на акционерските друштва.  На тој начин ќе добијат можност да го рекламираат доброто работење и да го зголемат општиот имиџ, а со тоа во иднина ќе имаат шанса полесно да прибираат капитал од широката јавност. 

Добрата соработка меќу Комисијата и ИФЦ-Меѓународната финансиска корпорација сакаме да продолжи и во наредниот период, особено што ние како регулатор сме исправени пред имплементација на нова законска регулатива која ги опфаќа речиси сите сегмети на пазарот на хартии од вредност.

 Ако цениме по досегашното ниво на поддршка и постигнатите ефекти, можеме со право да очекуваме дека нашиот партнер -ИФЦ ќе не следи при спроведувањето и на идните реформи на пазарот на капитал. Ви Благодарам на вниманието...