Координациското тело на финансиските регулатори за финансиска едукација и финансиска инклузија, во соработка со асоцијациите и институциите од приватниот сектор и непрофитните институции активни во доменот на финансиската едукација, деветта година по ред ја одбележуваат Глобалната недела на парите, којашто оваа година е во периодот 22 ‒ 28 март. Темата на Глобалната недела на парите за оваа година е: „Грижи се за себе, грижи се за своите пари“ (Take care of yourself, take care of your money).

Заради пандемијата со корона-вирусот, активностите за време на Глобалната недела на парите оваа година, главно ќе се одвиваат преку е-предавања и објави на едукативни материјали на интернет-страниците на институциите и на социјалните мрежи. Виртуелните едукативни предавања ќе бидат наменети за учениците од основните и средните училишта од нашата земја на теми од областите што ги покриваат одделните институции, поврзани со функционирањето на финансискиот систем.

Комисијата за хартии од вредност на Република Северна Македонија и оваа година зема активно учество во одбележувањето на овој настан како во рамки заедничките активности со Координациското тело за финансиска едукација и инклузија, но и со индивидуални активности во насока на подигнување на свеста кај граѓаните за важноста од нивна едукација за управувањето со личните финансии, како и работењето на финансискиот сектор.

Во таа насока, Комисијата подготвува и објавува на својата веб страна широк спектар на едукативен материјал и едукативни анимирани видеа на македонски, албански и англиски јазик со теми кои се актуелни и релевантни за пазарот на капитал, за основните поими од областа на хартии од вредност, инвестирањето, финансиските инструменти, но и за значенењето и функциите на регулаторот на пазарот на хартии од вредност во нашата држава.

Како новитет на веб страната на Комисијата е и едукативнот квиз на тема “Колку го познавате пазарот на хартии од вредност” на македонски, албански и англиски јазик, а кој секој посетител на веб страната ќе може да го решава со цел да дознае колку ја познава областа на хартиите од врдност и пазарот на капитал.

Како една од најважните активности во која Комисијата како еден од организаторите има свој голем удел и придонес, а која ќе се реализира оваа недела, е секако националниот натпревар на Европскиот квиз на пари кој на 24-ти март ќе ги даде нашите претставници на престојното финале на квизот во Брисел.

На  светско ниво, Глобалната недела на парите се одбележува од 2012 година, со единствен прекин во 2020 година заради пандемијата, при што од 2021 година се одржува во организација на ОЕЦД. Оваа глобална иницијатива, којашто досега се одбележува во повеќе од 175 земји во светот, ја подигнува свеста кај младите за финансиската едукација и ги зголемува нивните знаења за парите, штедењето, вработувањето и претприемаштвото. Секоја година, младите луѓе разговараат, читаат и учат за економските и за финансиските системи преку најразлични активности што ги спроведуваат државните, финансиските и образовните институции. Целта на Глобалната недела на парите е да ги поттикне младите да инвестираат во својата иднина, истакнувајќи ја важноста на финансиската едукација, со што ќе се помогне тие да станат свесни за своите финансиски права, ќе им се олесни пристапноста до финансиските услуги и ќе се развијат нивните финансиски вештини.

Повеќе информации за Глобалната недела на парите на врската: