Неделава започна првата официјална мисија, во рамки на проектот за техничка помош за финансиска едукација на Организацијата за економска соработка и развој (ОЕЦД) и Министерството за финансии на Холандија, којшто се одвива во седум земји од холандската конституенца при ММФ и Светската банка. Покрај Комисијата за хартии од вредност , носители на овој петгодишен проект се и Министерството за финансии, Народната банка на Република Северна Македонија , Агенцијата за супервизија на осигурување и Агенцијата за супервизија на капитално финансирано пензиско осигурување. Целта на проектот е градење на капацитетите за развој на финансиската едукација, како и изработка на национална стратегија за финансиско едуцирање на населението.

     Се одржаа и две тркалезни маси на кои учествуваа  претставници на приватни и на регулаторни финансиски институции, коишто членуваат во Координациското тело за финансиска едукација и финансиска инклузија.

    Исто така, претставниците на ОЕЦД  остварија  работни средби со експерти од Министерството за финансии и Министерството за образование и наука, како и со неколку меѓународни организации.

  Овие активности претставуваат уште една потврда за заложбите на финансиските регулаторни институции за следење на светските трендови во делот на финансиската писменост, како и за зајакната координација во овој домен и со приватните финансиски институции.