На 11-06-2020 година, Комисијата за хартии од вредност на Република Северна Македонија и Академијата за Банкарство и Информатичка Технологија-АБИТ почитувајќи ги превентивните мерки за заштита од корона вирусот преку online конекција го реализираа тестирањето на знаењето на слушателите на третото ниво од Програмата на Сертифицираната обука за портфолио менаџер која стартуваше во месец март изминатата 2019 година.

Во рамки на третото ниво слушателите на обуката ја следеа наставната програма која го опфати шестиот модул од обуката односно поконкретно управувањето со портфолиото или портфолио менаџментот (portfolio management).

Истакнати предавачи од универзитетската фела, како и искусни професионалци-практичари од областа на портфолио менаџментот го пренесоа своето познавање на темите за теоријата на портфолиото, пазарите на капитал, инвестирањето во хартиите од вредност, како и управувањето со портфолијата на институционални и индивидуални инвеститори, мерењето на перформансите, алокацијата на средства по класи и сектори, стратегиите и практичните примери од управување со портфолио.

Со реализација на третото ниво од Програмата на Сертифицираната обука за портфолио менаџер се заокружува циклусот на наставна програма за слушателите кои се пријавија на оваа едногодишна обука организирана од страна на Комисијата за хартии од вредност на Република Северна Македонија  и Академијата за Банкарство и Информатичка Технологија-АБИТ.