Во Комисијата за хартии од вредност денес, 22 јуни 2026 година, се одржа работилница посветена на препораките врз кои треба да се темели новата Стратегија за институционален регулаторен  развој  во пресрет на претстојната реформска регулатива  за пазарот на капитал, кои се изработени во рамките на проектот SUPRAE, финансиран од Европската Унија.

Пред претставниците од брокерските куќи, овластените банки за работа со хартии од вредност, Македонска берза и Централниот депозитар за хартии од вредност, друштвото за инвестициско советување и вработените од КХВ, експертот ангажиран од Европската комисија, Пјер Матек, ги презентираше клучните препораки што треба да ги содржи стратегискиот документ од аспект на усогласување на домашната регулатива со европското законодавство и нејзината примена, модернизација на пазарната инфраструктура, зајакнување на заштитата на инвеститорите и развој на пазарот на капитал како целина. Експертот Пјер Матек, кој е поранешен претседател на хрватскиот регулатор ХАНФА, во оваа пригода препорача: "Стратегијата за развој на пазарот на капитал 2027–2032 ќе ја потврди заложбата за изградба на модерен и отпорен пазар, усогласен со европските стандарди. Новата законска рамка, која стапува во сила од октомври 2026 година, ќе донесе јасни правила за инвестициските фирми, издавачите и сите регулирани субјекти, со цел да се зајакне транспарентноста, довербата и интегритетот".
 
Комисионерот Васко Пејков истакна дека поддршката од Европската комисија доаѓа во вистински момент за пазарот на капитал и е од особена важност бидејќи непосредно сме пред стартот на двата нови закона: Законот за финансиски инструменти и Законот за проспекти и обврски за транспарентност за издавачите на хартии од вредност.

Насоките од европскиот експерт ќе послужат како темел за подготовка на Стратегијата на Комисијата за хартии од вредност за периодот 2027-2032 година, со цел создавање поефикасен, потранспарентен и поконкурентен пазар во согласност со европските стандарди.

Овие препораки се резултат на неколкумесечниот ангажман на експертот, кој низ дијалог со засегнатите учесници и со регулаторот ги стекна своите согледувања за пазарот на капитал кај нас.