Одржана TAIEX работилница
16.05.2024
Во рамки на соработката на Комисијата за хартии од вредност на Република Северна Македонија со ЕУ Директоратот за меѓусоседска политика и проширување, се одржа дводневна TAIEX работилница  (13-ти и 14-ти мај 2024 година) на која како експерти говореа претставници на Агенцијата за надзор на финансиските услуги на Република Хрватска.

Пред претставници од котираните компании на Македонската Берза АД Скопје, вработените од брокерските куќи, овластените банки за работа со хартии од вредност, друштвата за управување со отворени и затворени инвестициски друштва, друштвото за инвестиционо советување и вработените од Комисијата за хартии од вредност беа презентирани теми од областа на транспарентноста и обврската за известување од страна на акционерските друштва и инвестициските друштва, од областа на пазарните злоупотреби во поглед на инсајдерско тргување и пазарна манипулација, како и спроведувањето на контролата и супервизијата согласно релевантните ЕУ директиви и регулативи од областа.

Оваа работилница е од особена важност бидејќи се реализираше по усвојувањето на новата законска регулатива од областа на пазарот на капитал, односно на двата закона: Законот за финансиски инструменти и Законот за проспекти и обврски за транспарентност за издавачите на хартии од вредност.

Па оттука, колегите од Агенцијата за надзор на финансиските услуги на Република Хрватскa овозможија подобро разбирање на новините, со што ќе се олесни процесот на имплементација на законската и подзаконската регулатива на пазарот на капитал од страна на пазарните учесници.

Преку знаењата со кои се стекнаа присутните ќе се придонесе кон зајакнување на пазарниот интегритет, поголема заштита на инвеститорите од пазарните манипулации и злоупотреби и прудентно спроведување на супервизија врз пазарните учесници.