Во рамки на соработката на Комисијата за хартии од вредност на Република Северна Македонија со ЕУ Директоратот за меѓусоседска политика и проширување од 13-ти до 15-ти март и од 21-ви до 22-ри март 2024 година, се одржаа сесии на TAIEX експертската мисија кои беа спроведени од страна на претставници од Агенцијата за надзор на финансиските услуги на Република Хрватска.

Пред вработените од Комисијата за хартии од вредност, Македонската Берза АД Скопје и од Централниот депозитар за хартии од вредност АД Скопје беа презентирани теми од областа на транспарентноста на акционерските друштва, инвестициските друштва, местата за тргување и овластените депозитари согласно релевантните ЕУ директиви и регулативи од областа.

Оваа експертска мисија е од особена важност за Комисијата бидејќи се реализираше непосредно по донесувањето на новата законска регулатива од областа на пазарот на капитал, односно на двата реформски закона: Законот за финансиски инструменти и Законот за проспекти и обврски за транспарентност за издавачите на хартии од вредност.

Па оттука, експертите од Хрватска овозможија подобро разбирање на новините, со што се олеснува процесот на дефинирање, изработка и имплементација на подзаконската регулатива на пазарот на капитал.

Преку знаењата со кои се стекнаа вработените ќе се придонесе за поефикасна регулаторна рамка која ќе обезбеди зајакнување на пазарниот интегритет, воведување на нови финансиски инструменти, заштита на инвеститорите од пазарните манипулации и злоупотреби, спроведување на супервизија и лиценцирање на пазарните учесници и местата на тргување и чување на финансиските инструменти.