Комисијата за хартии од вредност на Република Северна Македонија во периодот од 03-ти јуни до 07-ми јуни во соработка со Меѓународниот Балкански Универзитет за прв пат реализираа Летна школа за студенти и млади професионалци на тема Обезбеди успех: Вовед во финансиските пазари и пазарот на хартии од вредност.

Вработените од Секторот за истражување и развој на пазарот на капитал и меѓународна соработка заедно со професорите на Факултетот за економски и административни науки при Меѓународниот Балкански Универзитет со поддршка на Халк Банка АД Скопје подготвија наставна програма за студентите од додипломски, магистарски и докторски студии која ги опфати следниве тематски подрачја: видови на хартии од вредност, карактеристики и употреба на различни финансиски инструменти, усогласеност во финансиските институции,  платформи за тргување со деривативи, пазар преку шалтер, стратегии на тргување во различни пазарни услови, хеџинг стратегии, како и алатки и практики за управување со ризик.

Оваа петдневна летна школа имаше за цел да им овозможи на учесниците да се запознаат со најновите трендови и практики во областа на финансиските пазари, инвестициските инструменти и регулаторни рамки од областа на пазарот на капитал. Наставната програма вклучуваше предавања со презентации во форма на практични сесии, а учесниците имаа можност да се консултираат со искусни професионалци и експерти од областа на пазарот на капитал.

Летната школа се одржa на кампусот на Меѓународниот Балкански Универзитет, но студентите имаа можност да ја посетат и Македонската Берза АД Скопје, да се запознаат со функцијата на оваа финансиска инстуција, како и за прв пат да го погледнат начинот на тргување со хартии од вредност во нашата земја.

Комисијата за хартии од вредност на Република Северна Македонија и Меѓународниот Балкански Универзитет ќе ја продолжат оваа традиција на практично и стручно доусовршување на студентите со единствена цел да го подигнат нивото на високото образование во нашата земја, но и на идната работна сила на пазарот на капитал да им овозможат запознавање со праксата пред теоријата.