Комисијата за хартии од вредност на Република Северна Македонија ги одбележа Деновите за финаниска едукација со повеќе активности. Целта беше да се зајакне финансиската едукација, но и да се поттикне финансиската инклузија со зголемување на свесноста и заштитата на инвеститорите.

Па така, на 31-ви мај 2019 година, Претседателот на Комисијата М-р Нора Алити потпиша Меморандум за соработка со Општинското средно економско училиште "8-ми Септември", Тетово претставено од Директорот Мирјета Илази, Средното економско општинско училиште „Гостивар", Гостивар претставено од Директорот Тони Ефремоски, како и со Средното општинско училиште „Мирко Милески", Кичево претставено од Директорот Милка Спасевска.

Исто така, во периодот од 29-ти до 31-ви мај пред платото на седиштето на Комисијата беше поставен инфо пулт каде сите граѓани можеа да пристапат и да добијат одговор на сите прашања кои ги имаат во врска со работата на регулаторот на пазарот на хартии од вредност, финансиските инструменти, заштитата на акционерските права. Во овој период, инфо пултот го посетија стотина граѓани кои покрај одговор на сите прашања добија и соодветен едукативен материјал, со цел информираност и едукација од областа.

Воедно, во оваа кампања заедно со регулаторот се вклучија и сите овластени учесници на пазарот на капитал и тоа Македонската Берза, Централниот депозитар на хартии од вредност, брокерските куќи, дирекциите кои работат со хартии од вредност во банките, како и друштвата за управување со инвестициски фондови на кои во овие три дена им беа отворени вратите за граѓаните.