Комисионерката Лиле Делиџакова во периодот од 13 до 15 мај, 2019 година  учествуваше на Годишната Конференција на IOSCO, чиј домаќин беше Австралиската комисија за хартии од вредност и инвестиции( Australian Securities and Investments Commission).

    Овој еминентен настан во Сиднеј ги собра  претставниците на земјите членки на Меѓународната организација на Комиисите за хартии од вредност – IOSCO , кои регулираат повеќе од 95% од светските пазари на хартии од вредност во повеќе од 115 јурисдикции.

   На панел дискусиите кои се одржаа во рамките на Конференција беа третирани актуелни теми кои се однесуваат на пазарите на капитал,  при што беше констатирано дека новите бизнис модели и технологии брзо го менуваат финансискиот пејзаж, на кој регулаторите треба  да се прилагодуваат секојдневно и заеднички.

     Беше дискутирано  за глобалните перспективи, можности и предизвици со кои се соочуваат финансиските пазари и за тоа каква регулација на финансиските услуги е потребна во  иднина. Дилеми за  регулаторите се:  "Како да се поттикне и да се одржува регулаторна средина која ќе биде погодна за технолошки иновации, а во исто време да обезбедува заштита на инвеститорите и финансиска стабилност? Кои се главните лекции научени од страна на регулаторите при поддршка на иновациите? Кои се добрите и лошите страни на различни пристапи кон FinTech револуцијата? Што се добрите и лошите страни на регулацијата  посветена на крипто-валути за разлика од користењето на постојната регулаторна рамка?

    Учесниците  презентираа свои гледишта за тоа : Како ќе изгледаат пазарите 5 до 10 години од сега со ваков  раст на дигитализацијата  и иновациите, особено што постојните регулаторни рамки главно се наменети за традиционални ,,играчи,, на пазарот и активности, а  споделија и искуства како со локални решенија се реагира на глобалните ризици со кои се соочуваат пазарите на хартии од вредност.

   На маргините на Конференцијата, Комисионерката Делиџакова оствари и средби со нејзините колеги од Хрватска, Словенија, Албанија, Норвешка, Холандија, Белгија, Перу, Нигерија и Мексико со кои било дискутирано за состојбите на домашните пазари и за реформите кои се спроведуваат од аспект на имлементација на европските директиви, како  и за можностите за продлабочена соработка во иднина.

Оваа Конференција е 44-та по ред која што традиционално IOSCO ја организира секоја година.