Започнa традиционалната Глобална недела на парите, којашто повеќе години наназад со бројни активности од сферата на финансиската едукација се одбележува и во нашата земја. Како и претходните години и во претстојните денови Комисијата за хартии од вредност на Република Северна Македонија реализира голем број активности за јакнење на свеста за потребата од поголема финансиска писменост на населението, а истовремено ги промовира и предностите од поголема финансиска инклузија.

       Комисијата како член на Координациското тело на регулаторни институции за финансиска едукација и инклузија се вклучи во едукативниот караван кој оваа година се организира за училиштата од рурални делови на земјава, а на нивната агенда  во текот на Глобалната недела на парите  се сите регулаторни институции на финансискиот систем. Во таа насока, на 25 март, 2019 година, Комисијата за хартии од вредност на Република Северна Македонија беше домаќин на учениците ОУ „Фаик Коница" од с. Дебреше, Гостивар. При посетата на регулаторот на пазарот на хартии од вредност, учениците се запознаа  со надлежностите и функциите на Комисијата, како и за пазарот на хартии од вредност и неговите учесници.

       Комисијата, постојано остварува активности за збогатување на финансиските знаења на младата популација, како своевиден придонес за градење на капацитетот на идните генерации кои утре ќе бидат главни носители на економските и финансиските текови во нашето општество. За таа цел, во рамки на одбележувањето, Комисијата е вклучена и во сите останати едукативни активности во рамките на Глобалната недела на парите преку едукативни презентации и предавања од областа на пазарот на хартии од вредност, но и посети на други финансиски институции и учесници на пазарот.