Комисијата за хартии од вредност во рамките на континуираната соработка со Академијата за судии и јавни обвинители на 8 ноември, 2019 година  организираа  Советување на тема: „Тужби поврзани со надомест на штета при забранети дејствија во работењето со хартии од вредност“. Советувањето беше наменето за судии од граѓански оддели и стручни соработници од сите апелациони подрачја.

Предавачите Мате Стојановски, главен правен советник, Комисија за хартии од вредност и д-р Марко Андонов, редовен професор и декан на Факултет за правни науки, Универзитет Американ Колеџ Скопје опфатија повеќе теми поврзани со Законот за хартии од вредност, Закон за преземање на акционерски друштва, Закон за инвестицски фондови и со Закон за трговските друштва.

На советувањето беше направен осврт на забранетите дејствија при работење со хартии од вредност и право на тужба во случај на понуда на хартии од вредност, се дискутираше за ценовна манипулација, ширење неточни информации, користење на манипулативни и измамнички дејствија, за злоупотреба на внатрешни информации, за неточни финансиски извештаи и извештаи што предизвикуваат заблуда, за проспект кој содржи измамнички податоци. Исто така, стана збор за надоместот на штета во случај на преземање на акционерско друштво и  при користење на правата од хартии од вредност. Беа разменети и ставови околу поништувањето на берзанска трансакција што е  спорна судска пракса од аспект на пазарот на хартии од вредност.

Целта на КХВ и на Академијата на судии и јавни обвинители е преку вакви советувања да се зајакне судскиот систем и да се овозможи специјализација во споровите поврзани со хартиите од вредност, бидејќи токму судството ја претставува клучната оска за наметнување на прописите, што е предуслов за кредибилен систем на корпоративно управување.

Систематската обука на судиите за економските прашања и зголемената специјализација на судскиот систем, како и обелоденувањето на судските случаи и одлуките на судовите поврзани со областа на корпоративното управување и пазарот на  капитал придонесуваат за зголемување на свеста на деловниот сектор и ја прават повидлива заложбата за владеење на правото што пак е услов ,, contidio sine qvanon,, за привлекување на инвеститорите на пазарот на капитал.