Комисијата за хартии од вредност на РСМ  беше домаќин на претставници од регулаторните органи на Хрватска, Ерменија, Казакстан, Албанија и Украина кои под покровителство на IOSCO заеднички утврдуваат униформни стандарди и принципи за работа.

 Работилницата ја  отвори Претседателот на КХВ М-р Нора Алити која истакна: ,,Регулаторите како нас, да позајмам еден поим од  харвардскиот професор Малколм Спароу ''испорачуваат обврски'',  со цел да го сменат начинот на однесување. Јас честопати укажувам дека ние располагаме со широка палета на алатки, кои можеме да ги примениме за да постигнеме промена во однесувањето. Алатки кои може да се категоризираат како реактивни алатки и превентивни или проактивни алатки. Иако мојата филозофија како регулатор е дека подобро да се спречи, отколку да се открива, па да се казнува,  за во иднина  да одвратува од повторување, истовремено, гласно и јасно порачувам дека ова не значи дека нема да ги примениме сите наши законски извршни алатки и овластувања. Практики или поведенија преку кои одминуваме стануваат стандард кој го дозволуваме - ние нема да прифатиме никакво однесување ниту пак поведение што би го загрозиле интегритетот на пазарот. Затоа ја поздравувам можноста за продолжување на разговорите во Јереван и привршување на упатството за супервизија и истраги, кое ќе претставува рамка и водич за  надзор, за поведување, реализирање и завршување на истрагите и на сето тоа последователно,  изрекување на соодветни и правосилни санкции,,.

Г-ѓа Cecile de Wit во името на Генералниот секретар IOSCO Paul P. Andrews’s ја пренесе пораката дека IOSCO ги поддржува напорите на регулаторите за усогласување на нивното работење според меѓународните стандарди кои важат на развиените пазари на хартии од вредност. Имено, во периодот од 15 до 17 октомври, 2019 година, претставниците од Комисијата за хартии од вредност заедно со претставниците од регулаторните органи на Хрватска, Ерменија, Казакстан, Албанија и на Украина разменуваа искуства и споделуваа мислења за начините на вршење супервизија и спроведување на истраги, како и за надлежностите  за прибирање на информации и документи, за ефективноста на законските решенија, за меѓусебната соработка , како и за  комуникацијата на интернационално ниво.

Ова е третата фаза на проектот IOSCO Technical Assistance Program for Developing Enforcement Manuals, кој започна пред неколку месеци. Основната цел е регулаторите на пазарите на капитал од регионот да изработат упатство кое ќе го опфати начинот на спроведување на супервизија и истраги од страна на регулаторите. Имено, една од основните начела на IOSCO е да постави униформни стандарди и принципи за работа кои ќе можат да ги применуваат сите регулатори кои се членки на оваа организација.

Резултат од оваа работилница  е изработка на сеопфатно упатство за Комисијата за хартии од вредност преку кое ќе биде опишан начинот на вршење на супервизија и истраги.