Комисијата за  хартии од  вредност на Република Македонија на 39-тата седница со која  претседаваше  Претседателот на КХВ Марина Наќева Кавракова даде согласност Даринка Дамјановиќ да биде именувана за вршител  на должност - директор на Централниот депозитар за хартии од вредност АД Скопје. Функцијата вршител на должност ќе може да ја врши шест месеци. Именувањето на Даринка Дамјановиќ за вршител на должност - директор на Централниот депозитар за хартии од вредност АД Скопје доаѓа откако Комисијата за хартии од вредност на Република Македонија во октомври едногласно донесе решение со кое не даде согласност Стеван Шапчески да биде повторно именуван за директор на Централниот депозитар за хартии од вредност АД Скопје. На Стеван Шапчески му престанува мандатот на 26 ноември 2011 година. Даринка Дамјановиќ  во моментов е Раководител на правен сектор во Централниот депозитар за хартии од вредност АД Скопје.

       Комисијата за хартии од вредност на Република Македонија на седницата  што се одржа на 22 ноември 2011 година донесе решение со кое на правното лице БРИК АД Берово и на Татјана Чичаковска им го одзема правото на глас и правото на дивиденда на обичните акции што ги поседуваат во Алкалоид АД Берово, а што како поврзани лица ги стекнале спротивно на Законот за преземање на акционерски друштва. Затоа, Комисијата  ги задолжи лицата кои се стекнале со акции спротивно на одредбите на законот, истите да ги понудат за продажба во рок кој не може да биде подолг од 90 дена.

КХВ издаде и една лиценца за инвестициски советник.​