Комисијата за хартии од вредност на Република Македонија на 35-тата седница едногласно донесе решение со кое не даде согласност Стеван Шапчески да биде повторно именуван за директор на Централниот депозитар за хартии од вредност АД Скопје.

     Комисијата за хартии од вредност оцени дека поради досега изречените мерки на предложениот кандидат му е нарушен интегритетот за функцијата директор  и со такво поведение согласно Законот за хартии од вредност и Правилникот за начинот и постапката на давање согласност за именување на директор на депозитар за хартии од вредност не може да биде  директор  на  Централниот депозитар за хартии од вредност АД Скопје. Според евиденцијата на КХВ против  Стеван  Шапчески  како директор на  ЦДХВ  АД Скопје изречени се повеќе санкции од кои неколку се времени одземања на согласноста за директор во траење од 30 работни дена.

     Имено, Стеван Шапчески  до  Комисијата  поднесе барање за добивање согласност за именување за директор на ЦДХВ, бидејќи во ноември оваа година му истекува мандатот. Стеван  Шапчески  на  ова  акционерско друштво  е  директор од октомври 2001 година.

      Исто така, Комисијата за хартии од вредност на РМ на седницата со која претседаваше  Претседателот на КХВ  Марина Наќева Кавракова, а се одржа на 07 октомври 2011 година, даде дозвола физичките лица Марија Толеска и Наташа Толеска да дадат понуда за откуп на сите акции, издадени од Тајмиште АД  Кичево.  Понудата за откуп се однесува на 17.917 обични акции со право на глас и на 2451 приоритетни кумулативни акции. Понудувачот се обврзува да ги откупи хартиите од вредност по цена од 1550 денари по акција. За таа намена, понудувачот  има  депонирани  средства  на  сметка  на  ЦДХВ и обезбедено две банкарски гаранции.

Најмалата количина  на  акции  со право на глас на кои се однесува понудата за откуп што треба да биде прифатена за да се смета за успешна е 26% од обичните акции со право на глас,односно 6.211 обични акции.

​  На  седницата беа издадени две дозволи за инвестициски советник.