Комисијата за хартии од вредност на Република Македонија на 30-тата седница ја одобри петтата емисија на  акции на  АД за осигурување Сава Табак – Скопје  по пат на приватна понуда. Станува збор за 5000 обични акции со продажна цена од 500 евра по акција  и  вкупен износ на емисијата од 2.500.000 евра.  Петтата емисија на акции на друштвото се врши со нови влогови  и е наменета за институционалниот инвеститор – постојан акционер Позаваровалница САВА Д.Д. Љубљана, Република Словенија.

    Зголемувањето на основната главнина, Сава Табак Осигурување АД Скопје го врши заради подобрување на финансиското работење и зајакнување на позицијата на друштвото на осигурителниот пазар. 

     Исто така, Комисијата за хартии од вредност на РМ   на  седницата што  се одржа на 1 јули 2011 година, донесе Решение со кое Илирика ДЗУ, д.о.о. Љубљана доби согласност да стекне квалификувано учество во друштвото за управување со инвестициски фондови Илирика Фунд  Менаџмент АД Скопје.  На овој начин, Илирика ДЗУ, д.о.о. Љубљана  има намера  да  се стекне дополнително со 20.000 акции  и со нив ќе поседува 70 проценти од вкупно издадените акции на друштвото.  Во моментов, Илирика ДЗУ, д.о.о. Љубљана поседува 15.000 обични акции во Илирика Фунд Менаџмент АД Скопјe, што претставува 50 проценти од вкупниот капитал на друштвото.

    Од денот на добивање на решението за согласност од КХВ ќе почне да тече законскиот рок од 90 ка­лен­дар­ски де­на во кои Илирика ДЗУ,д.о.о. Љубљана  ќе треба да се стекне со акциите. Добивањето согласност за квалификувано учество е чекор на друштвото за управување со инвестициски фондови Илирика Фунд Менаџмент АД Скопје за отпочнување на постапка  за докапитализација, односно за зголемување на основната главнина.​