Комисијата за хартии од вредност на Република Македонија на 27-та седница со која претседаваше Претседателот на КХВ Марина Наќева Кавракова даде согласност на измените и дополнувањата на Правилата за тргување на Македонската берза АД Скопје, со кои се воведуваат т.н. маркет мејкери, односно поддржувачи на ликвидност. Маркет мејкер може да биде секоја брокерска куќа и овластена банка која има овластување за тргување во свое име и за своја сметка и има склучено договор со Македонската берза  за ,,маркетмејкинг,, работи.

Маркет  мејкерот  создава  пазар  за  одредена  хартија од вредност, така што во Бест системот на Берзата внесува лимитирани куповни и продажни налози  за  хартијата од вредност и склучува трансакции  врз основа на тие налози во рамките на класичното тргување.

   На тој начин,  маркет мејкерите  придонесуваат  да се зголемат обемот на тргувањето, ликвидноста на хартијата и длабочината на пазарот, а се намалува распонот во цените на поединечните хартии од вредност.

Инаку, една членка може да се пријави за поддржувач на ликвидноста на една или повеќе хартии од вредност, а истовремено една хартија  од вредност  може да има еден или повеќе маркет мејкери.

Маркет мејкерите на финансиските пазари уште се нарекуваат и специјалисти или liquidity provider.

     На седницата што се одржа на 27 мај 2011 година, КХВ даде согласност на измените и дополнувањата на Правилата за котација на Македонската берза АД Скопје,  со кои се подигнуваат стандардите за обелоденување на ценовно чувствителните информации од страна на котираните друштва. Со овие  корекции,  Правилата за котација се усогласуваат со измените и дополнувањата на Законот за трговски друштва.​​