Комисијата за хартии од вредност при редовна контрола констатира дека брокерската куќа "Иново брокер" АД Скопје во текот на работењето, не ги почитувала Законот за хартии од вредност и правилата за тргување. Согласно Законот за хартии од вредност за сторените повреди, Комисијата на 140-тата седница со која претседаваше Претседателот на КХВ Марина Наќева Кавракова на "Иново брокер" АД Скопје, на одговорното лице  и на еден овластен брокер им изрече јавна опомена.

Исто така, КХВ донесе решение за отстранување на утврдени неправилности и незаконитости во работењето на "Иново брокер" АД Скопје и ја задолжи брокерската куќа во утврдениот рок да ги отстрани техничките недостатоци  во системот.

КХВ утврди дека Дирекцијата за работа со хартии од вредност и брокерско-посреднички услуги на Стопанска банка АД Скопје ја вршела услугата "чување на хартии од вредност" што вклучува отворање и водење на сметки на хартии од вредност по налог на клиентот нормирана во член 94 точка з од ЗХВ, за која нема побарано, ниту добиено согласност од КХВ. Заради тоа, Комисијата донесе решение за отстранување на утврдените неправилности и незаконитости во работењето, односно во рок од 30 дена да поднесе барање до Комисијата за добивање одобрение за обавување на услугата.