Комисијата за хартии од вредност на 134-та седница со која претседаваше Претседателот на КХВ Марина Наќева Кавракова, донесе решение со кое јавно ќе се обелоденат незаконитостите што ги има направено Акционерското друштво за осигурување Вардар Скопје во постапката за издавање на втора емисија на долгорочни хартии од вредност. Имено, друштвото врз основа на неконечно решение ја евидентирало втората емисија на акции, прво во Ценралниот регистар на РМ, а потоа и во Централниот депозитар за хартии од вредност АД Скопје, со што ги повредило одредбите на Законот за хартии од вредност, според кои хартиите од вредност се уплатуваат во рок од 15 календарски дена од конечноста на решението.

Поради предвременото евидентирање на емисијата, КХВ го санкционираше и Централниот депозитар за хартии од вредност АД Скопје со мерката-јавно објавување на утврдената неправилност во работењето на ЦДХВ.

Комисијата за хартии од вредност на брокерската куќа "Публикум" АД Скопје трајно и ја одзема дозволата за вршење на услуги со хартии од вредност. Истовремено, донесе решение за исполнување на условите за отворање на ликвидација и врз основа на тоа до надлежниот суд ќе поднесе предлог за отворање на ликвидација. КХВ ја изрече оваа санкција, бидејќи брокерската куќа се уште нема именувано директор со дозвола од Комисијата и не ги има исполнето континуираните услови за членство на Македонската берза АД Скопје.

Поради необјавување на ценовно чувствителна информација од страна на Тутунов комбинат Боро Петрушевски-Папучар АД Куманово,  а заради заштита на потенцијалните инвеститори, Комисијата донесе решение со кое се наложува времено да се прекине тргувањето со хартиите од вредност на ова друштво со посебни обврски за известување, како и времено да се забранат нетрговските преноси во период од 30 работни дена. Имено, Тутунов комбинат Куманово нема доставено известување до КХВ дека има статус неактивен во Регистарот на годишни сметки, што е негова законска обврска.

КХВ и изрече јавна опомена на брокерската куќа "Делта Брокер" АД Скопје и на директорот поради неправилност при одржувањето на основната главнина на  друштвото.

Комисијата за хартии од вредност на седницата што се одржа на 25 септември 2009 година, даде согласност за директори на две брокерски куќи. И тоа:

-  Јанка Димитрова да биде именувана за директор на брокерската куќа "Идеја Плус Брокер"АД Радовиш и

-  Велимир Шиповиќ доби согласност за директор на брокерската куќа "Иново Брокер "АД Скопје.