Комисијата за хартии од вредност на 131-та седница со која претседаваше Претседателот на КХВ Марина Наќева Кавракова, донесе решение со кое на Акционерското друштво за осигурување Вардар Скопје  му даде одобрение да издаде втора емисија на долгорочни хартии од вредност по пат на приватна понуда. Со оваа емисија, Акционерското друштво за осигурување Вардар Скопје ќе издаде 45.138 обични акции, во вкупна вредност од 180.552.000 денари. Емисијата се врши заради зголемување на основната главнина на друштвото.

         Комисијата за хартии од вредност при непосредна контрола на брокерската куќа "Фершпед брокер" АД Скопје констатира дека брокер во текот на работењето не ги почитувал Законот за хартии од вредност и правилата за тргување, односно не биле реализирани три налози во целост и за нив нема склучено трансакции, иако на берзата постоеле пазарни услови за нивна реализација, согласно инструкциите дадени од клиентите. За сторените повреди, КХВ донесе решение за привремена забрана од 30 работни дена на овластениот брокер од "Фершпед брокер"АД Скопје да врши работи за кои има добиено дозвола.

        По спроведување на постапка пред Прекршочната комисија, КХВ им изрече опомена на над 50 акционерски друштва со посебни обврски за известување, бидејќи необјавувале податоци во Регистарот на акционерски друштва со посебни обврски за известување или пак нецелосно и ненавремено ја исполнувале таквата обврска.

        На барање на брокерската куќа "Ауктор Брокери" АД Скопје која поседуваше 150.000 евра основна главнина, КХВ дозволи отсега да врши само купување и продавање на хартии од вредност по налог и за сметка на клиентот, дејствување како покровител при котација и инвестициско советување за што во секое време "Ауктор Брокери"АД Скопје треба да поседува и да одржува 75.000 евра основна главнина. Тоа значи дека оваа брокерска куќа повеќе нема да управува со портфолио на хартии од вредност по налог и за сметка на индивидуален клиент.

         Комисијата за хартии од вредност на седницата која се одржа на 29 јуни  2009 година, даде согласност за директори на неколку брокерски куќи. И тоа:

• Александар Домазетовски да биде именуван за директор на брокерската куќа "Нови Триглав "АД Скопје;
• Оливера Клинчарова доби согласност за  директор на брокерската куќа "Делта Брокер " АД Скопје и
• Кирил Митровски и натаму да раководи со брокерската куќа "Инвестброкер" АД Скопје.

      Комисијата за хартии од вредност издаде и една дозвола за брокер и една лиценца за инвестициски советник.​