Комисијата за хартии од вредност на 128-та седница која се одржа на 18.05.2009 година, а со која претседаваше Претседателот на КХВ Марина Наќева Кавракова, не даде согласност на измените и дополнувањата на тарифата за висината на надоместоците на Македонската берза АД Скопје. Со тоа, КХВ не го прифати барањето на Македонската берза АД Скопје да се зголемат дел од надоместоците што таа ги наплатува од учесниците на пазарот и да се воведат нови надоместоци за нови услуги. Комисијата смета дека во услови на светска финансиска криза, со зголемување на надоместоците дополнително би се влошила состојбата на пазарот на хартии од вредност и дестимулативно би влијаело врз инвеститорите. Исто така, берзата би ја намалила својата и онака слаба конкурентност во однос на берзите од регионот.
Комисијата за хартии од вредност донесе решение за времено отповикување на согласноста на Стеван Шапчески за директор на Централниот депозитар за хартии од вредност АД Скопје во траење од 30 работни дена. Оваа санкција, Комисијата ја изрече бидејќи била извршена резервација на хартии од вредност и порамнување на трансакција врз основа на невалидно полномошно.
КХВ трајно им ја одзема дозволата за работење на двајца брокери вработени во брокерската куќа ”Иново Брокер” АД Скопје. При вонредна контрола на ”Иново Брокер” АД Скопје, утврдено е дека едниот од нив внел налог во Бест системот кој не бил потпишан од страна на клиентот, а другиот брокер го задржал, со што извршиле повреда на правилата за тргување и на Законот за хартии од вредност.
Комисијата за хартии од вредност при редовната контрола на брокерската куќа ”Илирика инвестментс” АД Скопје констатира дека во текот на работењето не ги почитувала Законот за хартии од вредност и правилата за тргување. Согласно Законот за хартии од вредност за сторените повреди, Комисијата на ”Илирика инвестментс” АД Скопје и на директорот им изрече јавна опомена.
КХВ ја задолжи ”Публикум” АД Скопје во рок од еден месец да отпочне постапка пред Комисијата за добивање согласност за директор на брокерската куќа и во истиот рок да вработи еден брокер или инвестициски советник. Вакво решение КХВ донесе, бидејќи при вонредна контрола беше констатирано дека брокерската куќа не е кадровски екипирана. ”Публикум” АД Скопје е веќе санкционирана од страна на Македонската берза АД Скопје поради неисполнување на континуираните услови за членство и од 1 април годинава брокерската куќа не тргува.