Комисијата за хартии од вредност при редовната контрола на брокерската куќа ”Бро Дил”АД Скопје утврди дека во текот на работењето не ги почитувала Законот за хартии од вредност и правилата за тргување. Неколку налози биле реализирани по цени пониски од цените определени во налозите од страна на клиентите, што е во спротивност со законските одредби во кои стои дека во текот на својата работа, брокерот треба строго да се придржува кон инструкциите дадени од клиентот. Согласно Законот за хартии од вредност за сторените повреди, КХВ изрече санкции за двајца овластени брокери, вработени во ”Бро Дил” АД Скопје. На едниот од нив трајно му ја одзема дозволата за работење, а на другиот брокер му изрече привремена забрана од 30 работни дена да врши работи за кои има добиено дозвола.

Комисијата за хартии од вредност при неколку редовни и вонредни контроли на брокерската куќа ”Алта Виста Брокер” АД Скопје констатира дека брокерската куќа не ја одржува висината на основната главнина. Согласно Законот за хартии од вредност, КХВ ќе отпочне постапка за изрекување глоба на брокерската куќа ”Алта Виста Брокер” АД Скопје и на одговорното лице.

При редовната контрола на Секторот за инвестициско банкарство ”Статер Банка ” АД Куманово утврдени се незаконитости и непочитување на правилата за работа со хартии од вредност во работењето. Затоа, КХВ донесе решение за изрекување јавна опомена на овластен брокер, вработен во Секторот за инвестициско банкарство ”Статер Банка”АД Куманово.

Комисијата за хартии од вредност на 121-та седница што се одржа на 16.02.2009 година, а со која претседаваше Претседателот на КХВ Марина Наќева-Кавракова донесе Решение за одбивање на барањето на Друштвото за градежништво, трговија и услуги Козјак АД Куманово за давање одобрение за продажба на сопствени акции по пат на приватна понуда. Комисијата го одби барањето, бидејќи Друштвото за градежништво, трговија и услуги Козјак АД Куманово во определениот рок целосно не постапи по забелешките кои се содржани во посебен акт на Комисијата за хартии од вредност, кој му е доставен на друштвото.