​Комисијата за хартии од вредност издаде дозвола на Централна кооперативна банка АД Софија, Република Бугарија да даде понуда за откуп на обичните акции издадени од Силекс Банка АД Скопје. 
Понудата за откуп на акции се однесува за 183.388 обични акции на Силекс банка. Централна кооперативна банка АД Софија се обврзува да ги откупи хартиите од вредност по цена од 4.791 денари.
На 92-та седница на Комисијата за хартии од вредност што се одржа на 21.01.2008 година, а со која претседаваше Претседателот Марина Наќева - Кавракова беа дадени дозволи за работа на две брокерски куќи и тоа на: Пеон брокер АД Скопје и Мој Брокер АД Скопје. 
-Пеон брокер АД Скопје е регистрирана со основна главнина од 76.022,75 евра во денарска противвредност, поделена на 4.650 обични акции со номинална вредност од 16,3488 евра по акција.Согласно член 94 од Законот за хартии од вредност, оваа членка на пазарот на капитал ќе купува и ќе продава хартии од вредност по налог и за сметка на клиентот, ќе дејствува како покровител при котација и ќе има можност да врши инвестициско советување. Директор на Пеон брокер АД Скопје ќе биде Биљана Аризанкова.
-Мој Брокер АД Скопје има основна главнина од 80.000 евра во денарска противвредност, поделена на 8.000 обични акции со номинална вредност од 10 евра по акција. Оваа брокерска куќа ќе ги врши истите дејности како и Пеон брокер АД Скопје, односно ќе купува и продава хартии од вредност по налог и за сметка на клиентот, ќе дејствува како покровител при котација и ќе врши инвестициско советување.Со Мој Брокер АД Скопје ќе раководи Димче Панов.
Исто така, Комисијата за хартии од вредност издаде согласност Горан Марковски да биде именуван за директор на Дирекцијата за вршење услуги со хартии од вредност на Комерцијална Банка АД Скопје, a Ѓорѓи Палевски да биде директор на Поштел брокер АД Скопје. Беа издадени и четири дозволи за работење на брокер.
Комисијата за хартии од вредност донесе одлука да ја организира 13-тата по ред обука на кадри за работа со хартии од вредност (брокери) за најмногу 200 кандидати. За сите заинтересирани кои сакаат да ја следат обуката, КХВ дополнително ќе објави соопштение во дневниот печат и на својата веб страна во кое ќе бидат прецизирани условите и термините. ​