Комисијата за хартии од вредност на Република Северна Македонија на 51- вата седница со која претседаваше Претседателот на КХВ М-р Нора Алити ја донесе Годишната програма за работа за 2020 година.

Во неа, како главни постулати на делување се воспоставување на фер и транспарентен пазар на хартии од вредност, објективна и навремена заштита на акционерите и на инвеститорите, обезбедување на реален раст и развој на пазарот на хартии од вредност, едукација и зголемување на финансиската писменост и инклузија, зајакнување на човечкиот капацитет и аналитичките способности и експертиза, унапредување на ИТ потенцијалот  и  во таа  насока изработка на нови софтверски апликации во функција на супервизијата, поголема достапност на податоците и на полесно нивно доставување од страна на овластените учесници на пазарот.

Овие постулати се одраз на улогата, надлежностите и на позицијата на КХВ во финансискиот систем, како и на очекувањата кои ги имаат инвеститорите, акционерите, учесниците, креаторите на економската политика и пошироката јавност. КХВ при утврдувањето на приоритетите ги зема предвид основите за функционирањето на пазарите на хартии од вредност, напорите за целосна ЕУ интеграција и потребата од примена на високи стандарди при регулацијата. 

Годишната програма за работа за 2020 година  се донесува согласно член 184 од Законот за хартии од вредност, член 31 од Статутот на КХВ и Стратешкиот план за развој на пазарот на капитал за периодот 2020-2021 година.

На седницата што се одржа денеска на 20 декември, 2019 година, КХВ ги усвои и останатите документи поврзани со тековното работење на институцијата како Финански план и План за јавни набавки за 2020.