Комисијата за хартии од вредност на Република Северна Македонија на 173-татa седница со која претседаваше Претседателот на КХВ М-р Нора Алити донесе Решение со кое на "Кроација Осигурување" АД Друштво за неживотно осигурување Скопје му даде одобрение да ја издаде петтата емисија на акции по пат на приватна понуда. Со петтата емисија на акции "Кроација Осигурување" АД Друштво за неживотно осигурување Скопје ќе издаде 25.000 обични акции со номинална и продажна вредност од 100 евра  по акција, со вкупен износ на емисијата од 2.500.000 евра, односно 153.895.000 денари. Зголемувањето на основната главнина со нови парични влогови се врши за познат купувач – институционалниот инвеститор "Кроација Осигурување" д.д Загреб.  Друштвото издава нови обични акции заради зајакнување на капиталот и за усогласување со Законот за супервизија на осигурувањето.

           На седницата што се одржа денеска на 23 јануари, 2023 година, КХВ донесе Решение со кое на Друштвото за управување со отворени и затворени инвестициски фондови "ВФП Фонд Менаџмент" АД Скопје му се дава одобрение за организирање на нов фонд ГРАВЕ ФЛЕКС БОНД ЕВРО-отворен инвестициски фонд. ГРАВЕ ФЛЕКС БОНД ЕВРО се категоризира во групата обврзнички фондови (основна категорија), флексибилен (поткатегорија). Фондот е наменет за инвеститори кои имаат среднорочен до долг хоризонт за инвестирање, односно вложување на средствата од 1 до 10 години. Како инвеститори на Фондот може да бидат сите домашни и странски, правни и физички лица, како и специфични финансиски институции, кои не сакаат средствата да ги изложат на висок ризик . Покрај ГРАВЕ ФЛЕКС БОНД ЕВРО, ова е шестти отворен инвестициски фонд со кој управува Друштвото за управување со отворени и затворени инвестициски фондови "ВФП Фонд Менаџмент" АД Скопје.

Исто така, КХВ даде согласност на измените и дополнувањата на Статутот и на значајните измени и дополнувања на Проспектот на три отворени инвестициски фондови со кои управува Друштвото за управување со отворени и затворени инвестициски фондови "Генерали Инвестментс "АД Скопје и тоа:

  1.ОИФ Генерали Нова ЕУ;
  2.ОИФ Генерали БРИК;
  3.ОИФ Генерали Топ Брендови;

Согласност од КХВ добија и измената на Статутот и значајните измени и дополнување на Проспектот на Иново Статус Акции  - отворен инвестициски фонд, поднесени од Друштвото за управување со отворени и затворени инвестициски фондови "Иново  Статус" АД Скопје. 

КХВ даде виза на овие акти откако утврди дека се исполнети законските услови  и истите се усогласени со Законот за инвестициски фондови и со Упатството за категоризација на инвестициски фондови донесено од страна на Комисијата за хартии од вредност.

По завршена јавна расправа на која немаше коментари и забелешки, КХВ финално ги усвои:
1. Правилникот за изменување и дополнување на Правилникот за формата и содржината на Проспектот на отворен и затворен инвестициски фонд и
2. Правилникот за изменување и дополнување на Правилникот за формата, содржината и начинот на водење на Регистарот на инвестициски фондови и начинот на утврдување на идентификациски број на инвестицискиот фонд.