Комисијата за хартии од вредност на Република Северна Македонија на 170-татa седница со која претседаваше Претседателот на КХВ М-р Нора Алити донесе Решение со кое на Силк Роуд Банка АД Скопје и даде одобрение  за издавање на долгорочни хартии од вредност по пат на приватна понуда. Банката ќе издаде 1.709 обични акции од единасеттата емисија, при што поединечната продажна вредност на една акција е еднаква на номиналната и изнесува 36.111 денари по акција. Вкупната продажна вредност на емисијата изнесува 61.713.699 денари. Со единасеттата емисија на нови обични акции, Силк Роуд Банка АД Скопје врши зголемување на основната главнина со трансформирање на дел од хибриден инструмент (заем) даден од страна на единствениот акционер на Банката, Силк Роуд Капитал АГ, Цирих, Швајцарија, во траен влог во Банката, во согласност со Законот за трговските друштва, Законот за банки, Законот за хартии од вредност и со подзаконските прописи. Силк Роуд Банка АД Скопје ја издава емисијата заради одржување на соодветно ниво на стапка на редовен основен капитал и заштитни слоеви на капиталот согласно Законот за банки и соодветната подзаконска регулатива.

        На седницата што се одржа денеска на 23 декември, 2022 година, КХВ донесе Решение со кое на Друштвото за управување со отворени и затворени инвестициски фондови Иново Статус АД Скопје му се дава одобрение за организирање на еден отворен инвестициски фонд Иново Статус Солар. ОИФ Иново Статус Солар  е акциски фонд со инвестициска тема чиста енергија - обновливи извори. Наменет е за институционални и за индивидуални инвеститори, а тие ќе бидат изложени на умерено до високо ниво на ризик. Покрај ОИФ Иново Статус Акции, ова е втор отворен инвестициски фонд со кој управува ДУИФ Иново Статус АД Скопје.

        Исто така, Комисијата ја донесе Програмата за работа за 2023 година во која се зацртани целите кои како регулатор на пазарот на капитал треба да ги реализира  преку сет на активности, иницијативи, предлози. Програмата за работа за 2023 година e објавена на веб страната на КХВ на следниот линк: Програма за работа на КХВ за 2023.