Комисијата за хартии од вредност на Република Северна Македонија на 169-тата седница  со која претседаваше Претседателот на КХВ М-р Нора Алити на Триглав Осигурување Живот АД Скопје му даде одобрение да издаде втора емисија на 40.000 обични акции во вкупен износ од 2.000.000 евра. Зголемувањето на основната главнина со нови парични влогови се врши по пат на приватна понуда за познат купувач-институционалниот инвеститор- ТРИГЛАВ ИНТ, ХОЛДИНШКА ДРУЖБА Д.О.О.  Република Словенија.  Друштвото издава нови акции заради зајакнување на капиталот на Друштвото и усогласување со одредбите од Законот за супервизија на осигурување.

На седницата што се одржа денеска на 13 декември, 2022 година, КХВ откако утврди дека се исполнети законските услови за менување на дозволата за работење на ТТК Банка АД Скопје - Оддел за работа со хартии од вредност   одобри да се прошири обемот на услуги кои дополнително ќе ги врши овој пазарен учесник . Имено,  ТТК Банка АД Скопје - Оддел за работа со хартии од вредност  ќе ги врши услугите од Законот за хартии од вредност наведени во член 94 став 1 точка г) вршење на трансакции и активности за сметка на издавачот на хартии од вредност потребни за успешна јавна понуда на хартии од вредност, без задолжителен откуп на непродадените хартии од вредност, д) вршење на трансакции и активности за сметка на издавачот на хартии од вредност потребни за успешна јавна понуда на хартии од вредност, со задолжителен откуп на непродадените хартии од вредност и ж) извршување на трансакции и активности за сметка на трети лица потребни за преземање на едно акционерско друштво во согласност со Законот за преземање на акционерски друштва.

КХВ даде согласност за именување на лицето Катерина Илиќ Нонкуловска за раководител (директор) на Службата за услуги со хартии од вредност при Деловниот сектор за финансиски пазари и средства во НЛБ Банка АД Скопје за период од четири години.

Исто така, Комисијата го усвои  Предлог-Правилникот за измени и дополнување на Правилникот за формата и содржината на проспектот на отворен и затворен инвестициски фонд  и истиот го стави на јавна расправа, која ќе трае триесет календарски дена, во кои заинтересираните страни ќе може да ги истакнуваат своите коментари , по што ќе следува негово донесување.

На 169-тата седница, беа издадени една дозвола за работење на инвестициски советник и една за инвестициски агент.