Комисијата за хартии од вредност на Република Северна Македонија на 166-та седница со која претседаваше Претседателот на КХВ М-р Нора Алити донесе Решение со кое на "Про Кредит Банка" АД Скопје и даде одобрение за издавање долгорочни хартии од вредност по пат на  приватна понуда. Со шесттата емисија на акции "Про Кредит Банка" АД Скопје ќе издаде 2.600.000 обични акции со номинална и продажна вредност од 5 евра по акција, со вкупен износ на емисијата од 13.000.000 евра, во денарска противвредност.  Зголемувањето на основната главнина со нови парични влогови се врши за познат купувач – институционалниот инвеститор Про Кредит Холдинг АГ‘Цо.КгаА. со седиште во Ромерплац 33-37 (Rohmerplatz 33-37) 60486 Франкфурт на Мајна, Сојузна Република Германија.

На седницата што се одржа денеска на 11 ноември, 2022 година беше усвоена Супервизорска стратегија за спречување перење пари и финансирање тероризам преку која Комисијата  ќе  презема превентивни и корективни мерки со цел да обезбеди финансиските институции кои се под нејзина надлежност да воспостават широки и сеопфатни системи за надзор и за исполнување на обврските кои произлегуваат од законската и подзаконската регулатива за спречување перење пари и финансирање тероризам.

КХВ со одлука ја констатираше потребата за организирање на 21-та обука со стручен испит за работење со хартии од вредност и 11-та обука со стручен испит за инвестициско  советување.

Исто така, КХВ издаде три дозволи за работа со хартии од вредност и обнови една лиценца за брокер.