Комисијата за хартии од вредност на Република Северна Македонија на 151-та седница со која претседаваше Претседателот на КХВ М-р Нора Алити донесе Решение со кое се дава согласност на Загребачка берза  Д.Д Загреб да стекне квалификува­но учес­тво во Македонска берза АД Скопје, односно да се стекне со акции, чиј вкупен кумулативен износ не надминува 30% од вкупно издадените акции со пра­во на глас од Македонска берза АД Скопје.

Исто така, Комисијата му даде согласност на физичкото лице Стефан Степаноски, да стекне квалификува­но учес­тво во брокерската куќа Еурохаус АД Скопје, односно да се стекне со акции чиј вкупен кумулативен износ изнесува 14,43%, но не надминува 20% од вкупно издадените акции со право на глас од Еурохаус АД Скопје.

И двете трансакции за стекнување на акциите треба да се извршат во рок од 90 календарски денови од денот на добивање на согласноста од Комисијата за стекнување на квалификувано учество.

На седницата што се одржа денеска на 22 јуни, 2022 година, по завршена јавна расправа Комисијата за хартии од вредност донесе и два подзаконски акта и тоа:
-Правилник за задолжителната содржина, формата и роковите за доставување на извештаите за работењето од страна на инвестициските фондови, друштвата за управување со отворени и затворени фондови и депозитарната банка и
-Правилник за утврдување на нето вредноста на имотот на отворен и затворен инвестициски фонд и за пресметување на цената по удел или по акции во инвестицискиот фонд.