Комисијата за хартии од вредност на Република Северна Македонија на 147-та седница со која претседаваше Претседателот на КХВ М-р Нора Алити го разгледа и го усвои Предлог- Правилникот за задолжителната содржина, формата и роковите за доставување на извештаите за работењето од страна на инвестициските фондови, друштвата за управување со отворени и затворени фондови и депозитарната банка и согласно одредбите од Законот за хартии од вредност го објави за јавна расправа на веб страната на Комисијата за хартии од вредност во времетраење од 30 дена, каде заинтересираните страни ќе можат да ги дадат своите забелешки и сугестии.

Потребата од овој подзаконски акт произлегува од  Законот за изменување и дополнување на Законот за инвестициски фондови, кој влезе во сила во јули 2021 година. Со него  освен содржината, формата и роковите за доставување на извештаите за работењето од страна на инвестициските фондови, друштвата за управување со отворени и затворени инвестициски фондови и депозитарната банка. се уредува и начинот на поднесување на барања за давање согласности и одобренија на одредни акти согласно Законот за инвестициски фондови

На седницата што се одржа денеска на 10 мај, 2022 година, Комисијата даде согласност Катерина Илиќ Нонкуловска да биде именувана за Директор на Дирекцијата за работа со хартии од вредност и брокерско посреднички услуги - Сектор за средства и ликвидност при Стопанска Банка АД Скопје. Таа и досега беше на оваа позиција, а новата согласност и важи за период од 3 години.

КХВ даде 35 дозволи за работење на инвестициски агент. Од нив 27 лица имаат склучено договор за продажба на удели со ДУИФ КБ Публикум АД Скопје, а 8 со ДУИФ ВФП Фонд Менаџмент АД Скопје.

      Дозволата за работење на инвестициските агенти им престанува да важи  во моментот кога ќе се раскине договорот за продажба на удели со друштвото за управување со инвестициски фондови , со што лицата ќе бидат избришани од Регистарот на инвестициски агенти.