Комисијата за хартии од вредност на Република Северна Македонија на 144-та седница со која претседаваше Претседателот на КХВ М-р Нора Алити донесе решение со кое на Македонската берза АД Скопје и даде согласност да стекне квалификувано учество во Централен депозитар за хартии од вредност АД Скопје.  
Со издадената согласност, вкупниот кумулативен износ на акции кои Македонската берза АД Скопје може да ги поседува во ЦДХВ не смее да надминува 20% од вкупно издадените акции со право на глас од Депозитарот.Трансакцијата за стекнување на акциите треба да се изврши во рок од 90 календарски дена од денот на добивање на согласноста од Комисијата за стекнување на квалификувано учество.  Акциите ќе бидат стекнати со сопствени средства на Македонската берза АД Скопје.

На седницата што се одржа денеска на 13 април 2022 година, Комисијата на Друштвото за управување со отворени и затворени инвестициски фондови ВФП ФОНД МЕНАЏМЕНТ АД Скопје му даде согласност да биде соосновач на друштво за управување со инвестициски фондови во Република Бугарија, односно да стекне квалификувано учество од 37% од вкупно издадените акции и за тоа би вложило 148.000,00 евра  од основачката главнина која треба да изнесува 400.000,00 евра. Според Програмата за работа, друштвото во првите две години од своето постоење би основало еден отворен инвестициски фонд во Република Бугарија, чие портфолио ќе биде составено од акции од најразвиените и најрегулирани пазари во светот. Попрецизно, средствата на фондот ќе бидат инвестирани во хартии од вредност на издавачи чие седиште, односно претежна дејност се врши на територијата на САД, ЕУ, земјите членки на ОЕЦД и ЦЕФТА, како и на држави кои географски не припаѓаат во Европа, а чии регулирани пазари на хартии од вредност се членки на Светската федерација на берзи WFE.

Заради усогласување со постојната законска регулатива, а по поднесени пријави од страна на Друштвата за управување со отворени и затворени инвестициски фондови за запишување на отворените инвестициски фондови со кои управуваат во Регистарот на отворени инвестициски фондови кој го води Комисијата електронски на својата веб страна, КХВ на 23 отворени инвестициски фондови им даде нов единствен, непроменлив и неповторлив идентификациски број со кој се заменува  претходно определениот.

КХВ даде една дозвола за работење на брокер за период од 5 години.