Комисијата за хартии од вредност на Република Северна Македонија на 140-та седница со која претседаваше Претседателот на КХВ М-р Нора Алити донесе решение со кое Осигурителното брокерско друштво СН Осигурителен брокер АД Битола се запишува во Регистарот на акционерски друштва со посебни обврски за известување – дел за издавачи на должнички хартии од вредност.

Врз основа на евиденцијата за успешно реализирана јавна понуда на хартии од вредност – прва емисија на корпоративни обврзници  и од известувањето на Централниот депозитар за хартии од вредност од 1 март, 2022 година дека издавачот од понудените 8.000 обврзници  има продадено вкупно 7.583 обврзници за износ од 75.830.000 денари, Комисијата за хартии од вредност  заклучи дека се исполнети условите од Законот за хартии од вредност за запишување на Осигурителното брокерско друштво во Регистарот на акционерски друштва со посебни обврски за известување.  Друштвото се води во Регистарот од моментот на издавањето на хартиите од вредност до истекот на рокот на достасување и до целосно исплаќање на должничките хартии од вредност .

 На седницата што се одржа денеска  на 11 март, 2022 година, КХВ даде согласност за именување на  директори на два овластени учесника  и  тоа:

1. Миленко Ѓошевски да биде назначен за раководител-директор на Службата за работи со хартии од вредност на Шпаркасе Банка АД Скопје за период од една година и
2. Филип Петрушевски да биде директор на брокерската куќа Инвестброкер АД Скопје со мандат од 4 години .

И двајцата кандидати, и досега ја извршуваа оваа функција.

Исто така, по завршена јавна расправа  Комисијата го донесе Правилникот за кадровска, техничка и организациона оспособеност потребни за основање и работа на друштво за управување со отворени и затворени инвестициски фондови. Со овој подзаконски акт детално се пропишува кадровската, техничката и организационата оспособеност за основање и работа на друштвото за управување со отворени и затворени инвестициски фондови, како и се уредува потребната документација со која истата се докажува пред Комисијата за хартии од вредност .