Комисијата за хартии од вредност на Република Северна Македонија на 139-та седница со која претседаваше Претседателот на КХВ М-р Нора Алити, а се одржа денеска на 4 март, 2022 година разгледа и усвои два подзаконски акта и тоа:

       1.Правилник зa содржината на договорот за размена на информации и документи меѓу друштвата за управување со главниот  фонд и фондот напојувач, договорот за размена на информации помеѓу депозитарните банки на главниот фонд и фондот напојувач и договорот за размена на информации помеѓу овластените ревизори на главниот фонд и фондот напојувач;

Со овој Правилник кој КХВ го усвои по завршена јавна расправа се врши усогласување со Директивата 2009/65/ЕЗ на Европскиот парламент и на Советот од 13 јули 2009 година инкорпорирана во измените и дополнувањата на  Законот за инвестициски фондови.

      2.Предлог Правилник за утврдување на нето вредноста на имотот на отворен и затворен инвестициски фонд и за пресметување на цената по удел или по акции во инвестицискиот фонд:

Со Предлог Правилникот  се уредува:

- Утврдувањето на нето вредноста на имотот на инвестицискиот фонд и начинот на формирање на цената на уделите во отворениот инвестициски фонд, односно акциите во затворениот инвестициски фонд;
- Методите за пресметка на нето вредноста на имотот и обврските на инвестицискиот фонд;
- Начинот на пресметка на надоместокот за управување и надоместокот за депозитарната банка;
- Зачестеноста на утврдувањето на нето вредноста на имотот на инвестицискиот фонд и
- Начинот и роковите за известување за нето вредноста на имотот на инвестицискиот фондот и на цената на уделот во отворениот инвестициски фонд, односно на акцијата во затворениот инвестициски фонд.

 Овој подзаконски акт, Комисијата го стави на јавна расправа во наредните 30 дена со цел засегнатите страни да ги кажат своите забелешки и сугестии.